Bosh prokuratura atrof-muhitni muhofaza qilish va iqlim o‘zgarishi vaziri Aziz Abduhakimovning “Yashil makon” loyihasi doirasida 2 milliondan ortiq ekilmagan ko‘chatlarni hisobotga “ekildi” deb qo‘shib yozilgani to‘g‘risidagi gaplariga munosabat bildirdi.
Aziz Abduhakimovning 4-iyul kuni Oliy Majlis Qonunchilik palatasi yalpi majlisida “Yashil makon” loyihasini amalga oshirilishi monitoringida aniqlangan kamchiliklar yuzasidan maʼruza qilgandi. Vazir “Yashil makon” loyihasi doirasida 2 milliondan ortiq ekilmagan ko‘chatlarni hisobotga “ekildi” deb qo‘shib yozilgani, sug‘orib bo‘lmaydigan joylarga 7,3 million tup nihol o‘tqazilgani, ekilgan 1,8 million tup ko‘chatni saqlash va parvarishlash uchun tegishli masʼullar belgilanmagani haqida gapirgan.
Qayd etilishicha, mazkur yalpi majlisda Bosh prokuraturaning Ekologiya, atrof-muhitni muhofaza qilish va o‘rmon xo‘jaligi sohasidagi qonunchilik ijrosi ustidan nazorat boshqarmasi boshlig‘i O‘ktam O‘tayev ishtirok etgan. Maʼruzada keltirilgan kamchiliklar Bosh prokuratura tomonidan alohida nazoratga olingan.
“Hozirda Bosh prokuratura va vazirlik mutaxassislaridan iborat tuzilgan ishchi guruh holatga qonuniy baho berish va aybdor shaxslarga nisbatan tegishli chora ko‘rish yuzasidan o‘rganish ishlarini boshladi”, — deyiladi xabarda.
Maʼlumot uchun, bugungi kunda O‘zbekistondagi yashil maydonlar 6 million 673 ming gektarni tashkil etadi. “Yashil makon” umummilliy loyihasi doirasida har yili kamida 200 million tup daraxt ekish belgilangani nazarda tutilgan. O‘tgan 2021-yilda respublikada 85 million tup, 2022-yilda jami 202,7 million tup daraxt ko‘chatlari ekilgan. Joriy yilning bahorgi mavsumida hududlarga 127,7 million tup daraxt o‘tqazilgan.
Izoh (0)