O‘zbekiston liberal-demokratik partiyasidan O‘zbekiston Respublikasi Prezidentligiga nomzod Shavkat Mirziyoyev sirdaryolik saylovchilar bilan uchrashuv chog‘ida kelgusi yetti yilda viloyatda transport sohasini rivojlantirishga oid rejalar haqida to‘xtaldi.
Xususan, Sirdaryo viloyatida jamoat transporti qatnovlarini ko‘paytirish uchun, 160 ta yangi avtobus olib kelinadi, zamonaviy loyihalar asosida 60 ta bekat quriladi.
Bular orqali, Sirdaryolik 600 mingdan ziyod odamlarning uzog‘i yaqin bo‘ladi.
“ ‘Toshkent – Xovos’ yo‘nalishidagi bundan 35 yil avval sotib olingan elektropoyezdlarni yangilaymiz. Buning uchun, 20 million dollar evaziga, zamonaviy elektropoyezdlar olib kelamiz”, – dedi nomzod.
Shavkat Mirziyoyev, shuningdek, 2023-yilning o‘zida Boyovut tumani va Shirin shahrida Saudiya Arabistonining “Acwa power” kompaniyasi tomonidan 1 milliard 100 million dollar sarmoya hisobiga, yana 1,5 ming Megavattli issiqlik elektr stansiyasi foydalanishga topshirilishini aytdi.
“Bundan tashqari, kelgusi ikki yilda Fransiya, Yaponiya va Qatar kompaniyalari konsorsiumi tomonidan 1 milliard 100 million dollar investisiya kiritilib, qo‘shimcha 1,5 ming Megavattli zamonaviy issiqlik elektr stansiyasi barpo etiladi”, – dedi nomzod.
Izoh (0)