Qirg‘iziston prezidenti Sadir Japarovning 17–19-may kunlari Pekinga tashrifi chog‘ida Xitoy—Qirg‘iziston—O‘zbekiston temiryo‘li loyihasining moliyaviy modeli tasdiqlanishi mumkin. Bu haqda “Ata Jurt” parlament fraksiyasi va “Mekenchil” deputatlar guruhining qo‘shma yig‘ilishida Vazirlar Mahkamasi raisi Aqilbek Japarov maʼlum qildi.
Unga ko‘ra, loyihaning texnik-iqtisodiy asoslari tayyor, uni moslashtirish ishlari olib borilmoqda.
“Maʼlumki, Qazarmangacha temiryo‘l tor bo‘ladi, keyin kengaytiriladi. U temiryo‘lning O‘zbekiston qismiga ulanadi. Loyihaning qiymati 3-5 milliard dollarga baholanmoqda. Birgina Qirg‘iziston hududida 57 ta tunnel quriladi”, — deydi u.
2022-yil iyunda Qirg‘iziston prezidenti Sadir Japarov 20 yil davomida rejalashtirilayotgan Xitoy—Qirg‘iziston—O‘zbekiston (CKU) temiryo‘li qurilishi jarayoni nihoyat oldinga siljiganini aytgandi. “Joriy yilda texnik-iqtisodiy asoslarni tayyorlab, qurilishni 2023-yilda ish boshlaymiz. Uchala davlat ham jarayonga tayyorlanmoqda. Bu orqali ish o‘rinlari yaratiladi, iqtisodiyotimiz esa yuksaladi”, — degan edi Japarov.
Prezident Shavkat Mirziyoyev 2022-yilda o‘tkazilgan Toshkent xalqaro investitsiya forumining ochilish marosimidagi nutqida ham ushbu temiryo‘l qurilishiga to‘xtalib o‘tgan.
“O‘zbekistonda ishlab chiqarilayotgan mahsulotlarni O‘zbekiston—Qirg‘iziston—Xitoy temiryo‘li orqali Osiyo—Tinch okeani mintaqasiga yetkazish uchun imkoniyatlar yaratish bo‘yicha amaliy harakatlar olib borilmoqda”, — degan davlat rahbari.
O‘zbekiston rasmiylari avvalroq temiryo‘l qurib bitkazilgandan so‘ng, bu Xitoydan Yevropa va Yaqin Sharqqa yuk tashish uchun eng qisqa yo‘l bo‘lib, yuk tashish yo‘lini 900 kilometrga qisqartirishini va 7-8 kunlik yuk tashish vaqtini tejashini aytgandi.
Xitoy—Yevropa yuk temiryo‘lining janubiy qismiga aylanadigan CKU yo‘nalishi Xitoy, Qirg‘iziston va O‘zbekistonni Eron va Turkiya orqali Markaziy va Sharqiy Yevropaga bog‘laydi. Rejaga ko‘ra, temiryo‘lning umumiy uzunligi qariyb 523 kilometrni tashkil etadi. Jumladan, Xitoyda 213 kilometr, Qirg‘izistonda 260 kilometr va O‘zbekistonda 50 kilometrga yaqin qismi quriladi.
Izoh (0)