Prezidentlikka nomzod Shavkat Mirziyoyev sirdaryolik saylovchilar bilan uchrashuvda har yili 5 ming nafar professor-o’qituvchilar tajriba almashish uchun xorijga yuborilishini aytdi.
Ushbu maqsad uchun 2030-yilga qadar 50 million dollar yo‘naltirish rejalashtirilmoqda.
“Shuningdek, har yili 200 nafar yosh olimlarimizni, keyinchalik oliygohlarga qaytib dars berish sharti bilan, xorijiy ilmiy tashkilotlarda dissertasiya yoqlashga jo‘natamiz. Oliygohlarning Ilmiy kengashlariga dunyoning nufuzli oliygohlaridan yetakchi professorlarni jalb qilish vaqti keldi”, – dedi nomzod.
Shavkat Mirziyoyev professor-o‘qituvchilar sharoitlarini yanada yaxshilash bo‘yicha islohotlar davom ettirilishini aytdi.
“Masalan, bugungi kunda oddiy assistent o‘qituvchining yillik o‘rtacha o‘quv yuklamasi 1 ming soatdan oshadi. Bunday ko‘p yuklama bilan o‘qituvchi qachon ilm qiladi, qachon o‘z ustida ishlaydi? Shu bois, professor-o‘qituvchilarning o‘quv yuklamasi 25 foizga qisqartiriladi va ularning ilmiy faoliyat bilan shug‘ullanishi uchun qo‘shimcha sharoitlar yaratiladi. Eng muhimi, bunda ularning ish haqi kamaytirilmaydi.
O‘z yo‘nalishi bo‘yicha xalqaro tan olingan kasbiy sertifikatlarga ega bo‘lgan o‘qituvchilarga qo‘shimcha ustamalar belgilanadi. Shuningdek, bunday sertifikati bor amaliyotchilarga dars berish uchun magistrlik diplomi talab etilmaydi”, – dedi nomzod.
Mirziyoyev hududlarda qurilayotgan uylarning 25-30 foizi professor-o‘qituvchilarga imtiyozli shartlarda berilishini aytdi.
Shuningdek, nomzod yana bir taklifni o‘rtaga tashladi.
“Yana bir taklifim bor. Oliygohlarda uzoq yillar ishlab, ilmiy maktablar yaratgan professor-o‘qituvchilar nomini shu dargohdagi kafedra, laboratoriya, kutubxona, auditoriya va o‘quv binolariga berish amaliyotini joriy qilsak, nima deysizlar?”, — dedi nomzod.
Izoh (0)