“Юкларни етказиб бериш 7-8 кунга қисқаради”. Илҳом Маҳкамов Хитой—Қирғизистон—Ўзбекистон темир йўли қурилиши аҳамияти ҳақида гапирди

Хитойдан Европага юк ташиш ҳажми ошгани боис Хитой—Марказий Осиё—Кавказ—Европа йўналишида юк ташишни ташкил этиш бўйича фаол ишлар олиб борилмоқда. Бу ҳақда Ўзбекистон транспорт вазири Илҳом Маҳкамов “Шериклик ташаббуслари ҳафталиги” доирасида ўтказилаётгн панел сессияда маълум қилди.

“Биз Хитой—Қирғизистон—Ўзбекистон темир йўли қурилиши лойиҳаси амалга оширилиши бошланишини муҳим воқеа деб биламиз. темир йўл қурилиши натижасида минтақа Шарқий Осиё ва Европа ўртасидаги асосий транзит марказларидан бирига айланиши, Форс кўрфази ва Тинч океани портларига энг қисқа йўл билан киришни таъминлаш орқали савдо-иқтисодий ва транзит салоҳиятни ошириш, Шарқий Осиёдан Яқин Шарқ ва Жанубий Европа мамлакатларига 900 километргача йўлни қисқартириш, шунингдек, юкларни етказиб бериш муддатини 7-8 кунга камайтириш имконияти яратилади”, — дейди Маҳкамов.

Транспорт вазирининг қайд этилишича, Ўзбекистон, Қирғизистон ва Хитой қурилиш лойиҳасининг янги босқичини бошлаган.

“Ишончим комилки, ушбу йирик инфратузилма лойиҳаларини амалга ошириш минтақавий шерикликни мустаҳкамлаш ва Марказий Осиё мамлакатлари ҳудуди бўйлаб юк ташиш ҳажмини оширишга туртки бўлади”, — дея таъкидлайди у.

Қирғизистон транспорт ва коммуникациялар вазири Тилек Текебаевнинг сўзларига кўра, транспорт-инфратузилмавий коммуникацияларни такомиллаштириш ва Марказий Осиёга халқаро транзит юк ташувчиларини жалб этиш минтақа давлатларини бирлаштирувчи энг муҳим йўналишлардан биридир.

“Шу маънода Хитой—Қирғизистон—Ўзбекистон темир йўли қурилиши лойиҳасининг амалга оширилиши Марказий Осиёни бутун бир логистика хабига, яъни жаҳоннинг муҳим бозорига айлантиришга ҳисса қўшиши билан аҳамиятлидир”, — дейди у.

Хитой—Қирғизистон–—Ўзбекистон темир йўли қурилиши лойиҳаси бўйича 2022 йил сентябрь ойида Самарқандда бўлиб ўтган ШҲТ саммити доирасида уч давлат вакиллари томонидан келишилган эди. 2023 йилнинг 29 апрелида темир йўл лойиҳасининг техник-иқтисодий асослари тайёрлиги маълум бўлган. 19 майда эса темир йўл қурилиши бўйича уч томонлама ҳужжат имзоланди.

Шавкат Мирзиёев 19 май куни Сиан шаҳрида бўлиб ўтган Марказий Осиё—Хитой биринчи саммитида “Хитойни минтақамиз билан боғлайдиган, Европа, Яқин Шарқ ва Африкага олиб чиқадиган хавфсиз ва энг қисқа транспорт йўлакларини ривожлантириш стратегик аҳамиятга эга. Буюк Ипак йўлини қайта тиклашда Транс-Евросиё магистрали лойиҳаси устувор аҳамиятга эга бўлиб, Хитой—Қирғизистон—Ўзбекистон автомобиль ва темир йўллари эса унинг муҳим таркибий қисми бўлади”, — деб айтганди.