Tashqi mehnat migratsiyasi agentligi Janubiy Koreyaga ishga ketish bilan bog‘liq jarayonlar haqida ijtimoiy tarmoqlarda tarqalgan turli xabarlarga munosabat bildirdi.
Qayd etilishicha, Janubiy Koreyada ishlash uchun bo‘lib o‘tayotgan imtihonlarda noqonuniy xatti-harakatlarni amalga oshirish maqsadida turli guruhlarning shakllanishi, imtihonlarga elektron vositalar, shpargalkalarni olib kirishga urinish, ushbu rejalar amalga oshmagach, turli bo‘htonlar tarqatish holatlari uchramoqda.
Ma’lumotlarga ko‘ra, 2023-yilda imtihon boshlangandan buyon EPS-Topik imtihoni tartiblariga rioya qilmagan 100 nafarga yaqin nomzod testdan chetlashtirilgan.
“Agar ijtimoiy tarmoqlarda bayon etilganidek test imtihoniga noqonuniy, xususan, 40 yoshdan kattalarning kirishi kabi asoslantirilgan holatlar mavjud bo‘lsa, dalillarni agentlikka yoki huquq-tartibot organlariga taqdim qilish so‘raladi.
Shu munosabat bilan, yurtdoshlarimizdan, asoslantirilmagan turli xabarlarga hamda Koreya Respublikasiga ishga ketish bilan bog‘liq jarayonlarda vositachilik xizmatlarini taklif etayotgan shaxslarga ishonmaslikni so‘raymiz”, — deyiladi munosabatda.
Agentlik mehnat migratsiyasi barcha jarayonlarining ochiq, adolatli va qonuniy bo‘lishi tarafdori hamda sohaga oid barcha savollarga javob berishga tayyorligini maʼlum qiladi.
Aprel o‘rtalarida Tashqi mehnat migratsiyasi agentligi chet elda ishlamoqchi bo‘lgan O‘zbekiston fuqarolari uchun Germaniya, Isroil, Yaponiya, Rossiya, Latviya, Litva, Bolgariya, Polsha davlatlariga bo‘sh ish o‘rinlari taklif etilayotganini ma’lum qilgandi. Shuningdek, Bandlik va mehnat munosabatlari vazirligi boshqarma boshlig‘i Zohid Asqarov ayrim firibgarlar chet elga ishlash uchun yuborishini aytib fuqarolardan 6 ming AQSH dollarigacha pul olayotgani, aldanganlar puldan ham, xorijda ishlashdan ham quruq qolayotganini aytgandi.
Izoh (0)