Ташқи меҳнат миграцияси агентлиги фуқароларни хорижда ишга жойлаштириш ваколатига эга бўлмаган ташкилотлар билан шартнома тузмасликка чақирди.
Хорижда ишлаш истагидаги фуқаролар учун қўшимча имкониятлар яратиш мақсадида Ўзбекистонда 2018 йилдан хусусий бандлик агентликлари (ХБА) фаолиятига рухсат берилган. Агентликка кўра, ўтган давр мобайнида айрим ХБА томонидан фуқароларни алдаш ва ишончини суистеъмол қилиш ҳолатлари содир этилган. Бу каби салбий ҳолатларнинг олдини олиш мақсадида “Хусусий бандлик агентликлари тўғрисида”ги қонунга ўзгартиш ва қўшимчалар киритилиб, 2020 йилнинг 14 ноябридан улар фаолиятида жиддий ўзгаришлар жорий этилган.
Амалдаги тартибга кўра:
- фуқароларни хорижда ишга жойлаштириш бўйича лицензияга эга ХБА ахборот ва маслаҳат хизматлари учун БҲМнинг бир бараваридан, яъни 330 минг сўмдан кўп пул олиши мумкин эмас;
- чет эллик иш берувчи ва ҳамкори билан шартномалар тузмасдан, фуқароларга хизмат кўрсатиш тақиқланади ҳамда ушбу шартномалар ХБАнинг расмий веб-сайтида жойлаштирилиши лозим.
Ўтган давр мобайнида ХБА реестридан 118 та юридик шахс рўйхатдан ўтган бўлиб, ҳозирги кунда улардан 9 таси фуқароларни хорижда ишга жойлаштириш ҳуқуқини берувчи лицензияга эга.
“Шу муносабат билан, хорижда ишга жойлаштириш ваколатига эга бўлмаган ташкилотлар ёки шахсларга ишонмасликка, турли кўринишдаги шартномаларни тузмасликка ва тўловларни амалга оширмасликка чақирамиз. Хорижда иш таклиф қилаётган ташкилотларнинг лицензияси борлигига ишонч ҳосил қилинг. Шартнома тузаётганда, унинг шартларини ўқиб, тўлиқ тушуниб имзо қўйинг”, — дейилади хабарда.
Агентлик фуқароларга ХБА билан низоли вазиятларга дуч келса, Камбағалликни қисқартириш ва бандлик вазирлигига мурожаат қилиши мумкинлигини эслатади.
Июнь охирларида бир гуруҳ Ўзбекистон фуқаролари ишлаш мақсадида Германияга бориб, қийин аҳволда қолгани ҳақида хабарлар тарқалганди. Унда 300 га яқин ёшлар ишлаш учун бориб сарсон бўлиб юргани, қаерга боришини билмай бир неча кундан бери вокзалда тунаётгани айтилган.
Камбағалликни қисқартириш ва бандлик вазирлиги томонидан эълон қилинган дастлабки ўрганишлар натижасида маълум бўлишича, Турон World Cooperation хусусий бандлик агентлиги МЧЖ вакиллари ўзларига таниш бир қатор ташкилотлар билан ҳамкорликда 2023 йилнинг май—июнь ойларида Work анд травел дастури орқали Германияга 102 нафар талабани жўнатган. Аммо Германияга етиб борган талабаларни иш билан таъминлашда муаммолар юзага келган.
Изоҳ (0)