Keyingi haftada jinoyat ishlari bo‘yicha Toshkent shahar Shayxontohur tumani sudida “Kompromatuzb ishi” ko‘rila boshlaydi. Bu haqda Ezgulik inson huquqlari jamiyati rahbari Abdurahmon Tashanov maʼlum qildi.
Abdurahmon Tashanov Facebook’da yozishicha, Bosh prokuratura tomonidan tasdiqlangan ayblov xulosasiga ko‘ra, 4 nafar shaxs — “Human.uz” sayti asoschisi va muharriri Xurshid Daliyev, Mehnat munosabatlari va bandlik vazirligi matbuot kotibi Mavjuda Mirzayeva, “O‘zbekneftgaz” AJ matbuot kotibi Siyovush Hoshimov va fuqaro Ahmadullo Ahmadjonovlar Jinoyat kodeksining 165-moddasi 3-qismi (tovlamachilik) va 243-moddasi (jinoiy faoliyatdan olingan daromadlarni legallashtirish) bilan ayblanmoqda.
“Hozircha sud kuni belgilanmagan. Qoidaga ko‘ra, mahkamaga raislik qiluvchi sudya kompyuter dasturi bo‘yicha tasodifiy tanlanadi. Sud muhokamalarining ochiq yoki yopiq o‘tkazilishiga oid maʼlumot mavjud emas. O‘zbekiston Respublikasi DXX Tergov boshqarmasi tomonidan olib borilgan tergov harakatlari davrida jinoyat ishining boshqa ishtirokchilariga oid qismi O‘zbekiston Respublikasi JPK talablari asosida alohida ish yurituviga olingan”, — deb yozgan huquq faoli.
Abdurahmon Tashanovning qo‘shimcha qilishicha, bugun (4-iyul) “Sof.uz” internet nashri va Anorbank xususiy tijorat banki o‘rtasidagi sudlashuvlar Oliy sudning kassatsiya instansiya sudida ko‘rila boshlangan. Toshkent tumanlararo iqtisodiy sudi birinchi instansiya sudida Anorbank foydasiga 3,7 milliard so‘m zararni qoplash bo‘yicha qaror chiqargan.
Avvalroq yanvar oyida “Human.uz” nashri direktori Xurshid Daliyev, bosh muharriri Muslim Mirzajonov va saytning boshqa xodimlari qo‘lga olingani xabar qilingandi. Fevralda “Daryo” muxbiri Xurshid Daliyev saqlanayotgan hibsxonada bo‘lib, u bilan tergov jarayonlari qanchalik qonuniy bo‘layotgani to‘g‘risida suhbatlashgandi.
“Advokat bilan uchrashish imkoni bor. Menga nisbatan hech qanday bosim yoki qiynoq bo‘lmadi. Umuman olganda, sog‘lig‘im, bu yerdagi sharoit va qonuniy huquqlarim borasida shikoyatim yo‘q. Hammasi o‘z o‘rnida taʼminlanmoqda”, — degan u.
Maʼlumot uchun, Jinoyat kodeksining 165-moddasi (tovlamachilik) 3-qismi — o‘n yildan o‘n besh yilgacha ozodlikdan mahrum qilish bilan jazolanadi.
Jinoyat kodeksining 243-moddasi Jinoiy faoliyatdan olingan daromadlarni legallashtirish — Jinoiy faoliyatdan olingan daromadlarni legallashtirish, yaʼni mulk (pul mablag‘lari yoki boshqa mol-mulk) jinoiy faoliyat natijasida topilgan bo‘lsa, uni o‘tkazish, mulkka aylantirish yoxud almashtirish yo‘li bilan uning kelib chiqishiga qonuniy tus berish, xuddi shuningdek bunday pul mablag‘lari yoki boshqa mol-mulkning asl xususiyatini, manbaini, turgan joyini, tasarruf etish, ko‘chirish usulini, pul mablag‘lariga yoki boshqa mol-mulkka bo‘lgan haqiqiy egalik huquqlarini yoki uning kimga qarashliligini yashirish yoxud sir saqlash, — besh yildan o‘n yilgacha ozodlikdan mahrum qilish bilan jazolanadi.
Izoh (0)