Prezident farmoni bilan ayrim normativ-huquqiy hujjatlarga o‘zgartirish va qo‘shimchalar kiritildi, deb xabar beradi Telegram’dagi “Huquqiy axborot” kanali.
Kiritilgan qo‘shimchaga ko‘ra, Qoraqalpog‘iston Respublikasida doimiy yashaydigan hamda umumiy o‘rta, o‘rta maxsus va professional taʼlim tashkilotlarini tamomlagan yoshlar uchun 2023/2024-o‘quv yilida davlat granti asosida qo‘shimcha 3 000 ta o‘rin ajratiladi.
Bunda soha va tarmoqlarning oliy maʼlumotli kadrlarga bo‘lgan ehtiyoji aniqlanib, oliy taʼlim muassasalari va taʼlim yo‘nalishlari kesimidagi takliflar O‘zbekiston taʼlim tashkilotlariga qabul qilish bo‘yicha davlat komissiyasiga 2023-yil 20-iyulgacha taqdim etiladi.
Kuni kecha Oliy taʼlim, fan va innovatsiyalar vazirligi OTMlari bakalavriat taʼlim yo‘nalishlariga qabul bo‘yicha arizalar statistikasini eʼlon qilgandi. Unga ko‘ra, 3-iyul soat 09:00 holatiga 129 ming 863 nafar abituriyent onlayn ro‘yxatdan o‘tgan. Shundan kunduzgi taʼlim uchun 86 ming 601 nafar, sirtqi taʼlimga 38 ming 494 nafar, kechkiga 3 ming 469 nafar, masofaviyga 1 ming 298 nafar abituriyent ro‘yxatdan o‘tgan.
Joriy o‘quv yilida davlat OTMlariga jami 206 ming 857 nafar abituriyent o‘qishga qabul qilinadi. Shundan 43 ming 783 nafari grant, 163 ming 74 nafari to‘lov-kontrakt asosida o‘qiydi. Bakalavriatga (kunduzgi) o‘tgan yilgiga nisbatan grantlar soni 10 foizga, kontrakt 1 foizga oshirilgan.
Izoh (0)