Кейинги ҳафтада жиноят ишлари бўйича Тошкент шаҳар Шайхонтоҳур тумани судида “Компроматузб иши” кўрила бошлайди. Бу ҳақда Эзгулик инсон ҳуқуқлари жамияти раҳбари Абдураҳмон Ташанов маълум қилди.
Абдураҳмон Ташанов Facebook’да ёзишича, Бош прокуратура томонидан тасдиқланган айблов хулосасига кўра, 4 нафар шахс — “Human.uz” сайти асосчиси ва муҳаррири Хуршид Далиев, Меҳнат муносабатлари ва бандлик вазирлиги матбуот котиби Мавжуда Мирзаева, “Ўзбекнефтгаз” АЖ матбуот котиби Сиёвуш Ҳошимов ва фуқаро Аҳмадулло Аҳмаджоновлар Жиноят кодексининг 165-моддаси 3-қисми (товламачилик) ва 243-моддаси (жиноий фаолиятдан олинган даромадларни легаллаштириш) билан айбланмоқда.
“Ҳозирча суд куни белгиланмаган. Қоидага кўра, маҳкамага раислик қилувчи судья компьютер дастури бўйича тасодифий танланади. Суд муҳокамаларининг очиқ ёки ёпиқ ўтказилишига оид маълумот мавжуд эмас. Ўзбекистон Республикаси ДХХ Тергов бошқармаси томонидан олиб борилган тергов ҳаракатлари даврида жиноят ишининг бошқа иштирокчиларига оид қисми Ўзбекистон Республикаси ЖПК талаблари асосида алоҳида иш юритувига олинган”, — деб ёзган ҳуқуқ фаоли.
Абдураҳмон Ташановнинг қўшимча қилишича, бугун (4 июль) “Sof.uz” интернет нашри ва Анорбанк хусусий тижорат банки ўртасидаги судлашувлар Олий суднинг кассация инстанция судида кўрила бошланган. Тошкент туманлараро иқтисодий суди биринчи инстанция судида Анорбанк фойдасига 3,7 миллиард сўм зарарни қоплаш бўйича қарор чиқарган.
Аввалроқ январь ойида “Human.uz” нашри директори Хуршид Далиев, бош муҳаррири Муслим Мирзажонов ва сайтнинг бошқа ходимлари қўлга олингани хабар қилинганди. Февралда “Дарё” мухбири Хуршид Далиев сақланаётган ҳибсхонада бўлиб, у билан тергов жараёнлари қанчалик қонуний бўлаётгани тўғрисида суҳбатлашганди.
“Адвокат билан учрашиш имкони бор. Менга нисбатан ҳеч қандай босим ёки қийноқ бўлмади. Умуман олганда, соғлиғим, бу ердаги шароит ва қонуний ҳуқуқларим борасида шикоятим йўқ. Ҳаммаси ўз ўрнида таъминланмоқда”, — деган у.
Маълумот учун, Жиноят кодексининг 165-моддаси (товламачилик) 3-қисми — ўн йилдан ўн беш йилгача озодликдан маҳрум қилиш билан жазоланади.
Жиноят кодексининг 243-моддаси Жиноий фаолиятдан олинган даромадларни легаллаштириш — Жиноий фаолиятдан олинган даромадларни легаллаштириш, яъни мулк (пул маблағлари ёки бошқа мол-мулк) жиноий фаолият натижасида топилган бўлса, уни ўтказиш, мулкка айлантириш ёхуд алмаштириш йўли билан унинг келиб чиқишига қонуний тус бериш, худди шунингдек бундай пул маблағлари ёки бошқа мол-мулкнинг асл хусусиятини, манбаини, турган жойини, тасарруф этиш, кўчириш усулини, пул маблағларига ёки бошқа мол-мулкка бўлган ҳақиқий эгалик ҳуқуқларини ёки унинг кимга қарашлилигини яшириш ёхуд сир сақлаш, — беш йилдан ўн йилгача озодликдан маҳрум қилиш билан жазоланади.
Изоҳ (0)