Европа комиссари Дидье Рейндерс Европа Иттифоқи Россиянинг музлатилган активларидан тушган маблағдан Украинани тиклаш учун фойдаланиш имкониятини муҳокама қилишда давом этаётганини айтди. Рейндерсга кўра, Европада блокланган Россия активлари миқдори 207 миллиард еврони ташкил қилади.
“Европа комиссияси Россиянинг Европада музлатиб қўйилган 207 миллиард евро миқдоридаги активлари, жумладан, Россия Федерацияси Марказий банки активларидан Украинани тиклашни молиялаштириш учун фойдаланиш имкониятини муҳокама қилмоқда”, — деди у.
Бу ҳақда Рейндерс Гаагадаги матбуот анжуманида айтиб ўтди. Унга кўра, Еврокомиссия шу йўл билан ҳар йили 3 миллиард еврогача маблағ олишни кутмоқда.
2022 йил октябрь ойидан бошлаб Европа Иттифоқи Кенгашининг юридик хизмати Украинани тиклаш учун Россия банкининг блокланган активларидан фойдаланиш имконини берувчи механизмни ишлаб чиқмоқда. Бельгия бош вазири Александр де Крунинг сўзларига кўра, Россиянинг Европада музлатилган активларининг 90 фоизи унинг мамлакатида сақланади, чунки Euroclear депозитарийси Бельгияда жойлашган.
Изоҳ (0)