“Tolibon” harakati yetakchisi Afg‘onistonning 34 viloyatidagi barcha ayollar go‘zallik salonlarini yopish to‘g‘risida buyruq chiqardi. Bu haqda “Daryo” muxbiri xabar berdi.
“Tolibon” Afg‘oniston ustidan hukmronlik qilganidan beri eng ko‘p yo‘qotishga mamlakat ayollari uchragan. Sababi harakat yetakchisining ko‘p buyrug‘i ayollarni qiyin ahvolga solib qo‘ygan.
2-iyul kuni e’lon qilingan ayollar go‘zallik salonlarini yopish to‘g‘risidagi navbatdagi buyruq ham buning yorqin misolidir.
“Kobul shahri va mamlakat viloyatlaridagi go‘zallik salonlariga bir oy muddat berilsin. Belgilangan muddatdan keyin ularning mehnat faoliyati taqiqlanadi va keyinchalik tuzilgan litsenziya hamda shartnomalar bekor qilinadi”, — deyilgan tegishli buyruqda.
Hirot viloyatidagi “Tolibon” rahbariyati go‘zallik salonlarida tartib o‘rnatib, ayollar bo‘yanishdan oldin tahorat olishi va salon ichida “100 foiz hijobga” rioya qilishi kerakligini aytgandi.
14 moddadan iborat ushbu qoidalar Hirot shahridagi go‘zallik salonlariga yuborilgan.
Namoz o‘qish, hijobga rioya qilish, salonlar atrofiga xavfsizlik kameralari o‘rnatish va obyekt atrofida erkaklarning bo‘lishini taqiqlash Hirotdagi “Tolibon” harakati qoidalariga kiradi.
Xuddi shunday cheklovlar Afg‘onistonning boshqa viloyatlarida ham joriy qilingan.
Hozirda Hirotdagi toliblar maʼmuriyatining buyrug‘iga ko‘ra, restoranlarda ayol va erkak bo‘limlari ajratilgan va restoranlarda muharramsiz turmushga chiqmagan qizlarga xizmat ko‘rsatish huquqi yo‘qligi aytilmoqda.
Afg‘onistonda ayollarga nisbatan joriy qilingan taqiqlar
Afg‘onistonlik ayollarning BMT idoralarida ishlashi, erkaklarga ayollar uchun kiyim tikish, ayollarning erkak shifokorlarga borishi, ayollarning shifoxonaga yolg‘iz borishi va ularning istirohat bog‘iga tashrif buyurishi taqiqlagan. Shuningdek, Afg‘onistonda oilalar va ayollarning bog‘lari yoki yashil hududlari bo‘lgan restoranlarga kirishi va ayollar ovozi eshitilgan reklamalarni efirga uzatish taqiqlangan.
Izoh (0)