BMTning Afg‘oniston bo‘yicha maxsus ma’ruzachisi Richard Bennett yangi hisobotida ta’limsiz qolgan o‘smir qizlar orasida ruhiy tushkunlik va o‘z joniga qasd qilish fikri ko‘payganini aytdi. Bu haqda Hasht-e Subh Daily xabar berdi.
Bu muammo bilan bir qatorda majburan turmushga berish va yosh bolalarni sotish holatlari ko‘paygan. Hisobotda bu aslida “Tolibon”ning 2021-yil avgustidan boshlab o‘z joniga qasd qilish holatlari kamaygani va ruhiy salomatlik yaxshilangani haqidagi daʼvolariga ziddir.
“Kamsituvchi va cheklovchi muhit, qo‘rquv muhiti va inson huquqlari buzilishi oldida javobgarlik yo‘qligi ayollar va qizlarning huquqlarini ro‘yobga chiqarishni imkonsiz qilgan”, — deyiladi hisobotda.
Ta’kidlanishicha, “Tolibon” 2021-yilning sentabridan 2023-yil mayigacha ayollarga qarshi 50 dan ortiq farmon chiqargan.
BMT maxsus ma’ruzachisiga ko‘ra, “Tolibon” farmonlari ayollar va qizlarning jamiyatda ishtirok etish, asosiy xizmatlardan foydalanish va pul topish imkoniyatlarini sezilarli darajada cheklaydi.
Izoh (0)