O‘zbekistonda Madaniyat markazlari faoliyatini muvofiqlashtirish bo‘yicha Jamoatchilik kengashi tashkil etildi

Madaniyat va turizm vazirining tegishli buyrug‘iga binoan Madaniyat va turizm vazirligi huzurida madaniyat markazlari faoliyatini muvofiqlashtirish bo‘yicha Jamoatchilik kengashi tashkil etildi. Bu haqda vazirlik matbuot xizmati xabar berdi.

Jamoatchilik kengashining asosiy vazifalari sifatida quyidagilar belgilandi:

• madaniyat markazlarida aholiga madaniy xizmat ko‘rsatish sifatini o‘rganish, ularda madaniy ehtiyojlarni qondirish va bo‘sh vaqtlarini mazmunli o‘tishini ta’minlash bo‘yicha amalga oshirilgan ishlar ko‘lamini o‘rganish;
• ijodiy jamoalarning milliy qadriyat, urf-odat va an’analarni o‘zida mujassam etgan namunali dasturlari shakllantirilganligi, xalq ijodiyoti va badiiy havaskorlik san’atini saqlab qolish va rivojlantirish, badiiy va amaliy ijodiy jamoalar, havaskorlik guruhlari faoliyatini o‘rganish;
• bolalarni to‘garaklarga jalb etish holati va to‘garaklarning tashkil etilganlik darajasi;
• madaniyat markazlarida kadrlar salohiyatini tahlil etish va tavsiyalar ishlab chiqish;
• ommaviy bayram, tomosha va xalq sayillarini tashkillashtirish, ijtimoiy-madaniy sohada yuridik va jismoniy shaxslar bilan tuzilgan shartnomalar bo‘yicha ularga pulli xizmatlar ko‘rsatish holati;
• tanlovlar, xalq ijodiyoti va tomosha san’atining tuman (shahar) festivallarini o‘tkazish, iqtidorli yoshlarni aniqlash, ijodkor yoshlarni qo‘llab-quvvatlash bo‘yicha amalga oshirilgan ishlar darajasi.

Shuningdek, kengash madaniyat markazlari faoliyatini tizimli ravishda o‘rganish hamda amaliy yordam ko‘rsatish bo‘yicha hududiy boshqarmalarga takliflar kiritish, madaniyat va turizm bo‘limlariga jamoatchilik kengashi vakolatiga kiradigan masalalar yuzasidan takliflar kiritish, madaniyat markazlari faoliyati samaradorligini oshirish bo‘yicha taklif va tavsiyalar ishlab chiqish va vazirlikka kiritish singari huquqlarga ega.

2018-yilning oktabr oyida Madaniyat vazirligi huzurida Jamoatchilik kengashi tuzilgandi. Shu munosabat bilan vazirlikda o‘tkazilgan yig‘ilishda sobiq madaniyat vaziri Baxtiyor Sayfullayev jamoatchilik kengashlarining asosiy vazifasi davlat organlari va ularning mansabdor shaxslari faoliyati ustidan jamoatchilik nazoratini o‘rnatish, fuqarolar va davlat organlari o‘rtasida o‘ziga xos ko‘prik bo‘lib xizmat qilishi lozimligini ta’kidlagan edi.