Шавкат Мирзиёевнинг 14 июндаги фармонига мувофиқ, болаларнинг дам олишларини тизимли ташкил этиш ва соғломлаштириш ишларини янада такомиллаштиришга доир қўшимча чора-тадбирлар белгиланиши муносабати билан айрим ҳужжатларга ўзгартириш ва қўшимчалар киритилди.
Киритилган ўзгартиришларга кўра, 2021 йилдан буён хусусийлаштирилаётган давлат активлари рўйхатидан “Сижжак” ва “Чотқол” дам олиш масканлари чиқариб ташланди. “Сижжак” дала ҳовлиси 124-мактаб-интернатнинг балансида сақланади, уни сотиш ёки фаолият турини ўзгартириш тақиқланган. Чотқол оромгоҳи эса Касаба уюшмалари федерацияси балансига ўтказилган.
5,38 гектар ҳудудни эгаллаган “Сижжак” 2021 йил апрельда, шунингдек, 2022 йилнинг апрель ва октябрьларида сотувга қўйилган, бироқ объект сотилмаган эди. Унинг ҳудудида спорт иншооти, меҳмонхона, учта сузиш ҳавзаси, амфитеатр, коттеж ва бошқа бинолар мавжуд. Объект 70 миллиард сўмга баҳоланганди.
“Сижжак” оромгоҳи 2017 йилнинг 10 февралида Жиноят ишлари бўйича Тошкент вилояти суди ажрими билан мусодара этилган. Кейинчалик мусодара қилинган ушбу ҳашаматли қароргоҳ ичидаги барча жиҳозлари билан Ўзбекистон Триатлон федерациясига вақтинчалик фойдаланишга берилган эди. Аммо охир-оқибат ушбу дам олиш масканини оммавий савдолар орқали шаффофлик принципи асосида сотувга қўйишга қарор қилинди.
Изоҳ (0)