O‘zbekistonda suv va alkogolsiz ichimliklarni majburiy raqamli markirovkalash joriy etiladi. Bu haqda CRPT TURON milliy operatori matbuot xizmati xabar berdi.
Qayd etilishicha, 2023-yil 1-iyuldan boshlab gazlangan yoki gazsiz suv, ichimliklar, shuningdek, fermentlanmagan shirin meva va sabzavot sharbatlari uchun markirovkalash majburiy bo‘ladi, uzum sharbati bundan mustasno.
Metall idishlardagi suv va alkogolsiz ichimliklar uchun Data Matrix kodlarini majburiy qo‘llash 2024-yil avgustidan joriy etiladi.
Raqamli markirovkalash — bu mahsulot haqidagi ma’lumotlarni elektron bazada saqlaydigan tovarlarni qadoqlash uchun maxsus Data Matrix kodini qo‘llashdir. Natijada har bir kishi tovar sifatini tekshirish va kuzatish imkoniyatiga ega bo‘ladi. Shu maqsadda iste’molchilarga sifatsiz mahsulotlar haqida xabar berish va kerakli ma’lumotlarni olish imkonini beruvchi “Asl Belgisi” mobil dasturi yaratilgan.
Bundan tashqari, dastur yordamida tadbirkorlar tovarlarning markirovkalanishini tekshirishlari hamda noqonuniy muomalada bo‘lgan alkogol va tamaki mahsulotlari bilan ishlashning oldini olishlari mumkin bo‘ladi.
Mart oxirlarida O‘zbekistonga import qilinadigan oziq-ovqat mahsulotlarini davlat tilida majburiy markirovka qilishni to‘xtatish muddati yana uzaytirilgandi. 2022-yil iyunda qabul qilingan “Iste’mol bozorlarida narxlar barqarorligini ta’minlashga va monopoliyaga qarshi choralarning ta’sirchanligini oshirishga doir qo‘shimcha chora-tadbirlar to‘g‘risida”gi prezident farmoni bilan O‘zbekistonga olib kiriladigan oziq-ovqat mahsulotlarini davlat tilida majburiy markirovka qilish tartibi 2023-yil 1-yanvargacha to‘xtatilgan edi.
Izoh (0)