Ўзбекистон бош вазири Абдулла Арипов 30 июнь куни газланган ва газланмаган сувлар ҳамда ичимликларни мажбурий рақамли маркировкалаш муддатини узайтириш тўғрисидаги қарорни имзолади.
Аввалига маркировкалашни 2022 йил октябрдан бошлаш режалаштирилган эди, кейин у 2023 йил 1 июлга қадар узайтирилганди, эндиликда ушбу муддат 2024 йил 1 мартга ўзгарди.
Рақамли маркировкалаш — бу маҳсулот ҳақидаги маълумотларни электрон базада сақлайдиган товарларни қадоқлаш учун махсус Дата Матрих кодини қўллашдир. Натижада ҳар бир киши товар сифатини текшириш ва кузатиш имкониятига эга бўлади. Шу мақсадда истеъмолчиларга сифатсиз маҳсулотлар ҳақида хабар бериш ва керакли маълумотларни олиш имконини берувчи “Асл Белгиси” мобил дастури яратилган. “Асл Белгиси” тизимида маркировкалаш, шунингдек, унинг назорати бўйича чора-тадбирлар 2023—2024 йиллар давомида босқичма-босқич амалга оширилади. Лойиҳани ишга туширишда ўтган йилги пилот лойиҳа тажрибалари инобатга олинади.
Маркировкалаш талаби ҳам маҳаллий ишлаб чиқарувчилар ҳам импортёрларга тегишли:
- биринчи гуруҳ учун (газланган ва газланмаган сувлар, ичимликлар, шунингдек, узумдан ташқари, ферментланмаган ширин мева ва сабзавот шарбатлари) — 2024 йил 1 мартдан;
- иккинчи гуруҳ учун (металл идишдаги сув ва ичимликлар) — 2024 йил 1 августдан (ўзгармаган).
Товарларни рақамли маркировкалаш тартибининг жорий этилиши ҳақида 2018 йил декабрда эълон қилинганди. 2019 йилда тизим оператори сифатида Алишер Усмоновнинг UMS холдинги ва “Ростех”га тегишли CRPT Turon танланган. Ҳозирда таъсисчи Digital Holding (100 фоиз) бўлиб, у Давлат активларини бошқариш агентлиги (49 фоиз), Digital Invest (46,1 фоиз) ва Вадим Кимга (4,9 фоиз) тегишли.
2021 йил ёзда сув ва ичимликлар ишлаб чиқарувчилар маркировкалаш бўйича пилот лойиҳани тўхтатишга чақирганди, уларнинг фикрича, бу иқтисодий жиҳатдан фойдали эмас. Маркировкалаш билан шуғулланувчи CRPT Turon компанияси уларнинг қўрқувини “афсона” деб атаганди.
2022 йил 15 апрелда маиший техникаларни мажбурий маркировкалаш бошланди. Битта код 68 сўмни ташкил этади (ҚҚСсиз).
Изоҳ (0)