“U tartib hozir yo‘q” — mutaxassis kontraktda o‘qiganlarga diplom berishda ishga kirgani haqida hujjat so‘ralmayotganini aytdi

OTMni to‘lov-kontrakt asosida o‘qib, tamomlagan bo‘lsa ham bitiruvchiga “ishga kirganing haqida imzo olib kel, diploming keyin beriladi”, degan antiqa tartib borligini eshitgandik. Bu qanchalik to‘g‘ri? Oliy taʼlim, fan va innovatsiyalar vazirligi departament boshlig‘i Abduvali Xoliqov “Daryo”ga bergan intervyusida ushbu savollarga javob qaytardi.

Abduvali Xoliqovning ta’kidlashicha, ikki yil avval bu tartib yo‘qolgan.  

“Bugungi kunda bu tartib antiqaligini yo‘qotgan, men sizga kafolat berib aytaman. Oxirgi ikki yilda kontraktda o‘qiganlardan bunday narsa so‘ralmayapti. Agar bo‘lsa, umumiy maʼlumot yig‘ib qo‘yiladi. Majburiy emas. To‘g‘ri, shu paytgacha majburiy bo‘lgan. Lekin davlat granti asosida o‘qiyotganlar bo‘yicha OTM albatta muvofiqlashtiradi. Shuning uchun ham farmoyish bilan davlat buyurtmasi tasdiqlandi. Bu yil faqat grant tasdiqlandi. Biz sekin-asta mehnat bozoriga moslashib boryapmiz. Yaʼni talabgor kontrakt pulini to‘lab, xohlasa o‘qiydi, xohlamasa o‘qimaydi. Grant uchun mablag‘ni davlat 100 foiz to‘lab beradi. Shu qismi davlat buyurtmasi hisoblanadi”, — dedi vazirlik vakili.

Abduvali Xoliqovning qo‘shimcha qilishicha, yangi o‘quv yilida bakalavr yo‘nalishidagi 34 ming 800 nafar talaba davlat granti asosida tahsil oldi. Bu o‘tgan yilgi kvotadan 10 foiz ko‘p degani.