Oliy ta’lim muassasalaridagi sirtqi taʼlimni masofaviy shaklga o‘tkazish masalasi ko‘rib chiqilmoqda. Bu haqda Oliy taʼlim, fan va innovatsiyalar vazirligi departament boshlig‘i Abduvali Xoliqov “Daryo” muxbiriga bergan intervyusida ma’lum qildi.
Abduvali Xoliqovning aytishicha, hozirda sirtqi ta’lim shakli o‘zini to‘liq oqlamayapti, tizimda bir qator kamchiliklar mavjud.
“Sirtqi taʼlim qaysidir sohada mehnat faoliyatini yuritayotgan, lekin oliy maʼlumotga ega bo‘lmaganlar uchun bo‘lishi kerak. Bizda esa hamma umumiy qabul qilinadi. Bu yildan boshlab, pedagogika yo‘nalishidagi sirtqi taʼlimga ushbu sohada faoliyat olib borayotganlar kiradi. U maktabdagi o‘qituvchilar sifatini oshirish uchun qilinadi. Boshqa sohalarda ham bu ish bosqichma-bosqich amalga oshiriladi. Yaʼni sirtqida o‘qish uchun qayerdadir ishlayotgan bo‘lishi kerakligi talab etiladi.
2022-yildan boshlab masofaviy taʼlim joriy etildi. Ikki yillik tahlillarga asoslanib, sirtqini masofaviy shaklga o‘tkazish masalasini ko‘ryapmiz. Yaʼni masofaviy taʼlimda sirtqiga o‘xshab faqat darsga kelganda emas, talaba platforma orqali doimiy onlayn topshiriqni olib turadi. Faqat bunga biz texnik tomondan tayyor bo‘lishimiz kerak. Talaba tomon ham. Oliy taʼlimda barcha sharoitni qilsangiz-u, uzoqdagi talabaning interneti yoki boshqa imkoniyatlari bo‘lmasa, bu ham jarayonga salbiy taʼsir ko‘rsatadi. Sirtqi taʼlimdagi shakllar bosqichma-bosqich tarzda masofaviyga o‘tadi. Chunki dunyoga qarasak, ikkalasi birga turibdi. Sirtqi taʼlimdan voz kechilishi kerak. Bugungi kunda u eskirgan holatga kelib qoldi, o‘zini oqlamayapti” — dedi u.
Abduvali Xoliqovning qo‘shimcha qilishicha, masofaviy sirtqi taʼlimga o‘tish uchun bir qator masalalar hal etilishi kerak.
“Masofaviy sirtqiga qachon o‘tilishini jarayon belgilab beradi. Oldindan bir nima deb bo‘lmaydi. Balki, uch yil yoki besh yilcha vaqt ketar. Platformalarni shakllantirish, internet tezligi yaxshi bo‘lishi zarur. Yaʼni imkoniyatlar va sharoit yetarli bo‘lgachgina tizim ishlaydi. Bu yerda masofaviy zo‘r bo‘lyapti deb, yo‘nalishlarni kengaytirib tashlayversak foydasi yo‘q. Ishlamasa, faqat qog‘ozda yoki gapda qolib ketadi” — dedi mutaxassis.
Izoh (0)