Davlat granti asosida o‘qigan bitiruvchilar diplom olishni uch yil kutadi. Buning sababi nima? Kelajakda ushbu tartibga o‘zgartirish kiritilishi mumkinmi? Oliy taʼlim, fan va innovatsiyalar vazirligi departament boshlig‘i Abduvali Xoliqov “Daryo”ga bergan intervyusida ushbu savollarga javob qaytardi.
Abduvali Xoliqovning aytishicha, diplomni oliy ta’lim muassasasida uch yil turishi masalasi ko‘rib chiqilyapti.
“Davlat buyurtmasi bilan o‘qigandan keyin davlat uchun ishlab berish kerak. Chunki unga pul to‘lab davlat o‘qityapti. ‘Mana, senga pul. 4 yilmi, 6 yilmi o‘qigin-da, keyin menga ishlab berasan’, deyapti. U iqtisodiyot tarmog‘i uchun xizmatini qilishi kerak. Chunki u bo‘yniga majburiyat olyapti. Bugungi kunda diplomni OTMda uch yil turishi masalasi ko‘rib chiqilyapti. Diplomlarni uch yil saqlab turishdan OTM manfaatdor emas. Lekin bu masala muammo chiqmaydigan qilib yechilishi kerak. ‘Yo‘q, men grantga kirdim, o‘zim o‘qiyman. Diplom meniki, bilganimni qilaman’, degan fikr noto‘g‘ri. Talaba davlatning mablag‘iga o‘qidimi, albatta, davlat uchun xizmat qilishi kerak. Mayli xususiy sektorda mehnat qiladimi, davlat tashkilotida ishlaydimi, davlat uchun xizmat qilishi lozim. Diplomni olgan bilan uni nima qiladi? Unga xohlagan joyiga ishga kirish imkoni mavjud-ku. Menda ham masalan, 5-6 ta diplom bor. Hammasi uyda turibdi. Ishga kirilayotgan paytda bitta ko‘rsatib, nusxasini berganmiz — bo‘ldi. Hammada ham shunaqa. Diplomni OTMda turishi umumiy mehnat faoliyatiga taʼsir ko‘rsatadigan omil emas” — dedi u.
Abduvali Xoliqovning ta’kidlashicha, bitiruvchi xorijiy OTMga o‘qishga borayotgan bo‘lsa, unga diplomi tez beriladi.
“O‘sha OTMdan xat kelsa, bo‘ldi. Bizga murojaat qiladi. OTMga xat beramiz va diplomini olib ketaveradi. Bu yerda sunʼiy to‘siqlar yo‘q” — dedi mutaxassis.
Avvalroq Abduvali Xoliqov sirtqi taʼlimni masofaviy shaklga o‘tkazish masalasi ko‘rib chiqilayotganini ma’lum qilgandi.
Izoh (0)