“У тартиб ҳозир йўқ” — мутахассис контрактда ўқиганларга диплом беришда ишга киргани ҳақида ҳужжат сўралмаётганини айтди

ОТМни тўлов-контракт асосида ўқиб, тамомлаган бўлса ҳам битирувчига “ишга кирганинг ҳақида имзо олиб кел, дипломинг кейин берилади”, деган антиқа тартиб борлигини эшитгандик. Бу қанчалик тўғри? Олий таълим, фан ва инновациялар вазирлиги департамент бошлиғи Абдували Холиқов “Дарё”га берган интервьюсида ушбу саволларга жавоб қайтарди.

Абдували Холиқовнинг таъкидлашича, икки йил аввал бу тартиб йўқолган.  

“Бугунги кунда бу тартиб антиқалигини йўқотган, мен сизга кафолат бериб айтаман. Охирги икки йилда контрактда ўқиганлардан бундай нарса сўралмаяпти. Агар бўлса, умумий маълумот йиғиб қўйилади. Мажбурий эмас. Тўғри, шу пайтгача мажбурий бўлган. Лекин давлат гранти асосида ўқиётганлар бўйича ОТМ албатта мувофиқлаштиради. Шунинг учун ҳам фармойиш билан давлат буюртмаси тасдиқланди. Бу йил фақат грант тасдиқланди. Биз секин-аста меҳнат бозорига мослашиб боряпмиз. Яъни талабгор контракт пулини тўлаб, хоҳласа ўқийди, хоҳламаса ўқимайди. Грант учун маблағни давлат 100 фоиз тўлаб беради. Шу қисми давлат буюртмаси ҳисобланади”, — деди вазирлик вакили.

Абдували Холиқовнинг қўшимча қилишича, янги ўқув йилида бакалавр йўналишидаги 34 минг 800 нафар талаба давлат гранти асосида таҳсил олди. Бу ўтган йилги квотадан 10 фоиз кўп дегани.