Давлат гранти асосида ўқиган битирувчилар диплом олишни уч йил кутади. Бунинг сабаби нима? Келажакда ушбу тартибга ўзгартириш киритилиши мумкинми? Олий таълим, фан ва инновациялар вазирлиги департамент бошлиғи Абдували Холиқов “Дарё”га берган интервьюсида ушбу саволларга жавоб қайтарди.
Абдували Холиқовнинг айтишича, дипломни олий таълим муассасасида уч йил туриши масаласи кўриб чиқиляпти.
“Давлат буюртмаси билан ўқигандан кейин давлат учун ишлаб бериш керак. Чунки унга пул тўлаб давлат ўқитяпти. ‘Мана, сенга пул. 4 йилми, 6 йилми ўқигин-да, кейин менга ишлаб берасан’, деяпти. У иқтисодиёт тармоғи учун хизматини қилиши керак. Чунки у бўйнига мажбурият оляпти. Бугунги кунда дипломни ОТМда уч йил туриши масаласи кўриб чиқиляпти. Дипломларни уч йил сақлаб туришдан ОТМ манфаатдор эмас. Лекин бу масала муаммо чиқмайдиган қилиб ечилиши керак. ‘Йўқ, мен грантга кирдим, ўзим ўқийман. Диплом меники, билганимни қиламан’, деган фикр нотўғри. Талаба давлатнинг маблағига ўқидими, албатта, давлат учун хизмат қилиши керак. Майли хусусий секторда меҳнат қиладими, давлат ташкилотида ишлайдими, давлат учун хизмат қилиши лозим. Дипломни олган билан уни нима қилади? Унга хоҳлаган жойига ишга кириш имкони мавжуд-ку. Менда ҳам масалан, 5-6 та диплом бор. Ҳаммаси уйда турибди. Ишга кирилаётган пайтда битта кўрсатиб, нусхасини берганмиз — бўлди. Ҳаммада ҳам шунақа. Дипломни ОТМда туриши умумий меҳнат фаолиятига таъсир кўрсатадиган омил эмас” — деди у.
Абдували Холиқовнинг таъкидлашича, битирувчи хорижий ОТМга ўқишга бораётган бўлса, унга дипломи тез берилади.
“Ўша ОТМдан хат келса, бўлди. Бизга мурожаат қилади. ОТМга хат берамиз ва дипломини олиб кетаверади. Бу ерда сунъий тўсиқлар йўқ” — деди мутахассис.
Аввалроқ Абдували Холиқов сиртқи таълимни масофавий шаклга ўтказиш масаласи кўриб чиқилаётганини маълум қилганди.
Изоҳ (0)