O‘zbekiston Narkotik moddalarni nazorat qilish milliy axborot-tahlil markazi maʼlumotiga ko‘ra, huquqni muhofaza qiluvchi organlar tomonidan 2022-yilda giyohvandlik vositalarining noqonuniy muomalasi bilan bog‘liq 8 681 ta jinoyat aniqlangan. Bu haqda “26-iyun — Xalqaro giyohvand moddalar isteʼmoli va noqonuniy aylanishiga qarshi kurashish” kuni munosabati bilan Davlat xavfsizlik xizmati tomonidan o‘tkazilgan tadbirda aytib o‘tildi, deya xabar bermoqda “Daryo” muxbiri.
Aniqlangan jinoyatlarning 2 513 tasi narkotik moddalarni o‘tkazish, 387 tasi kontrabanda, 1 711 tasi esa tarkibida giyohvandlik vositalari mavjud bo‘lgan o‘simliklarni yetishtirish bilan bog‘liq. Shuningdek, 3 156 tasi o‘tkazish maqsadini ko‘zlamay saqlash, 864 tasi kuchli taʼsir qiluvchi dori preparatlarining noqonuniy muomalasi va 40 tasi isteʼmol qilishga jalb qilish, 6 tasi ishlab chiqarish yoki foydalanish qoidalarini buzish, 4 tasi esa qonunga xilof ravishda muomalaga kiritish bilan bog‘liq narkojinoyatlarni tashkil etgan.
Sud idoralari tomonidan 2022-yilda giyohvandlik vositalarining noqonuniy muomalasiga oid 5 097 ta jinoyat ishi ko‘rib chiqilgan bo‘lib, 5 863 nafar shaxsga nisbatan jazo tayinlangan.
“Mahkumlar orasida yoshlar salmog‘ining ortib borayotgani achinarli. 2018-yilda bu ko‘rsatkich 19,1 foizni, 2019-yilda 22,6 foizni, 2020-yilda 24,8 foizni, 2021-yilda 21,6 foizni, 2022-yilda 25,3 foizni tashkil etgan”, — deyiladi Markaz axborotida.
Qo‘shimcha qilinishicha, Toshkent shahrida bu ko‘rsatkich 47,6 foizni yaʼni 1 486 tadan 580 tani tashkil etib, giyohvandlik bilan bog‘liq jinoyatlarning deyarli har ikkinchisi yoshlar tomonidan sodir etilmoqda.
Izoh (0)