Andijon viloyati hokimi Shuhrat Abdurahmonov 26-iyun kuni o‘tkazgan “Hokimlik soati”da uyi yonib ketgan jurnalistga 27-iyun — Matbuot va ommaviy axborot vositalari xodimlari kuni munosabati bilan yangi uy sovg‘a qilishini maʼlum qildi. Bu haqda “Daryo” muxbiri Umidjon Mamarasulov xabar bermoqda.
“Hokimlik soati” avvalida viloyat rahbari hududda faoliyat olib borayotgan, bosma va elektron ommaviy axborot vositalari xodimlari, nashriyot, pochta va matbuot tarqatuvchi tashkilotlar xodimlari, sohaga aloqador barcha tashkilot va muassasalar vakillarini bayram bilan tabriklab, Andijonni har tarafdan yuksaltirishda ularga tayanishini maʼlum qilgan.
Shuningdek, matbuot xizmatlari faoliyatini rivojlantirish hamda ularni OAV va jamoatchilik bilan hamkorlikda ishlash bo‘yicha bir qancha taklif va tashabbuslarni ilgari surgan.
“Bundan keyin har haftada bir marotaba hududlarda press-tur va matbuot anjumanlari o‘tkaziladi. Oy yakunida esa ochiqlikni taʼminlash bo‘yicha qilinayotgan ishlar muhokama qilinib, viloyat va hududlar kesimida mavjud kamchiliklarni bartaraf etish bo‘yicha jurnalist va blogerlarning tanqidiy-tahliliy fikrlari eshitilib, muammolarni bartaraf etish bo‘yicha ishlar tizimli nazoratga olinadi”, — degan Shuhrat Abdurahmonov.
Yig‘ilish davomida viloyat hokimi joriy yilning 24-iyun kuni Andijon shahrining “O‘zgarish” mahallasida sodir bo‘lgan yong‘in oqibatida yashab turgan uyi yonib ketgan va turar joy muammosiga duch kelgan viloyat Majburiy ijro byurosi axborot xizmati rahbari Oyista Abdurahmonovaga har tomonlama yordam ko‘rsatilishini aytib, yangi uy sovg‘a qilinishini bildirgan. Oyista Abdurahmonovaning Shuhrat Abdurahmonovga qarindoshlik joyi yo‘q.
Izoh (0)