Ўзбекистон Наркотик моддаларни назорат қилиш миллий ахборот-таҳлил маркази маълумотига кўра, ҳуқуқни муҳофаза қилувчи органлар томонидан 2022 йилда гиёҳвандлик воситаларининг ноқонуний муомаласи билан боғлиқ 8 681 та жиноят аниқланган. Бу ҳақда “26 июнь — Халқаро гиёҳванд моддалар истеъмоли ва ноқонуний айланишига қарши курашиш” куни муносабати билан Давлат хавфсизлик хизмати томонидан ўтказилган тадбирда айтиб ўтилди, дея хабар бермоқда “Дарё” мухбири.
Аниқланган жиноятларнинг 2 513 таси наркотик моддаларни ўтказиш, 387 таси контрабанда, 1 711 таси эса таркибида гиёҳвандлик воситалари мавжуд бўлган ўсимликларни етиштириш билан боғлиқ. Шунингдек, 3 156 таси ўтказиш мақсадини кўзламай сақлаш, 864 таси кучли таъсир қилувчи дори препаратларининг ноқонуний муомаласи ва 40 таси истеъмол қилишга жалб қилиш, 6 таси ишлаб чиқариш ёки фойдаланиш қоидаларини бузиш, 4 таси эса қонунга хилоф равишда муомалага киритиш билан боғлиқ наркожиноятларни ташкил этган.
Суд идоралари томонидан 2022 йилда гиёҳвандлик воситаларининг ноқонуний муомаласига оид 5 097 та жиноят иши кўриб чиқилган бўлиб, 5 863 нафар шахсга нисбатан жазо тайинланган.
“Маҳкумлар орасида ёшлар салмоғининг ортиб бораётгани ачинарли. 2018 йилда бу кўрсаткич 19,1 фоизни, 2019 йилда 22,6 фоизни, 2020 йилда 24,8 фоизни, 2021 йилда 21,6 фоизни, 2022 йилда 25,3 фоизни ташкил этган”, — дейилади Марказ ахборотида.
Қўшимча қилинишича, Тошкент шаҳрида бу кўрсаткич 47,6 фоизни яъни 1 486 тадан 580 тани ташкил этиб, гиёҳвандлик билан боғлиқ жиноятларнинг деярли ҳар иккинчиси ёшлар томонидан содир этилмоқда.
Изоҳ (0)