O‘zbekistonda Qurbon hayiti kuni qanday ob-havo bo‘lishi ma’lum qilindi

O‘zbekiston aholisi bayramni qulay ob-havo sharoitida kutib oladi, deb xabar bermoqda “O‘zgidromet”.

Ma’lum qilinishicha, 26-iyun, dushanba kuni respublika bo‘yicha harorat 30-33 daraja, janubda 39-41 daraja salqin ob-havo saqlanib turadi. 27—30-iyun kunlari havo harorati biroz ko‘tariladi va 34-37 daraja, janubda 39-41 daraja atrofida bo‘ladi.

Faqat shanba va yakshanba kunlari 1—2-iyulda O‘zbekiston hududiga issiq havo kirib kelishi kuchayadi va kunduzgi harorat yana 38-40 darajagacha, janubda ba‘zi joylarda 42 darajagacha ko‘tariladi.

Ushbu haftaning oxirigacha respublika bo‘yicha havo asosan kam bulutli bo‘ladi, yog‘ingarchilik kutilmaydi, faqat Farg‘ona vodiysi hududlari bilan chegaradosh tog‘oldi va tog‘li hududlarda 26—28-iyun kunlari ba‘zi joylarda qisqa muddatli yomg‘ir yog‘ishi, momaqaldiroq bo‘lishi mumkin.

26-iyunda shimolda, 27—29-iyunda respublikada ba‘zi joylarda shamol tezligi 13-18 metr/sekundgacha kuchayishi, ayrim joylarda chang-to‘zon bilan kuzatilishi mumkin.

Toshkentda havo biroz bulutli bo‘ladi, vaqti-vaqti bilan o‘zgarib turadi, yog‘ingarchilik kutilmaydi. Harorat 26-iyun kunduzi 32-34 daraja, 27—30-iyunda 34-37 daraja, 1—2-iyulda 37-40 daraja bo‘ladi.

O‘zbekistonda Qurbon hayitining birinchi kuni 28-iyun kuniga to‘g‘ri kelishi haqida e’lon qilingandi. Bayram munosabati bilan aholi ketma-ket 5 kun dam oladi.