Sirdaryo viloyati hokimligining 60 yillik nashrlari — “Yangi Sirdaryo” va “Novaya Sirdarya” gazetalari jamoasi iqtisodiy tanglik sabab yoppasiga taʼtilga chiqdi. Bu haqdagi xabarni “Daryo” jurnalisti bilan suhbatlashgan tahririyatlar bosh muharriri Muhammad Ismoilov tasdiqladi.
Bosh muharrirga ko‘ra, tahririyatlarning 12 nafar xodimi 2023-yilning 15-iyun kunidan boshlab mehnat taʼtilida.
“Iqtisodiy ahvol sabab shu qarorga keldik. Bir oydan so‘ng yana faoliyatimizni davom ettiramiz, degan niyatdamiz. Viloyat hokimi shu yilning fevral oyida ham, kuni kecha iyun oyining boshida ham tahririyat jamoasi bilan ko‘rishib, qo‘llab-quvvatlashini bildirgan”, — deydi gazeta bosh muharriri.
“Daryo” muxbiri bilan suhbatlashgan boshqa manbaning aytishicha, gazeta jamoasining bir oylik taʼtildan qaytishi dargumon.
“Gazetaning ahvoli juda og‘ir. Viloyat hokimi gazetani qo‘llab-quvvatlayman deganiga 4-5 oy bo‘ldi. Lekin shu muddat ichida tahririyatga bir so‘m ham bermagan. Qanday qilib jamoaning saqlanib qolishidan umid qilish mumkin?” — deydi gazeta jamoasiga yaqin manba.
Manbaning aytishicha, aslida gazeta jurnalistlarining maoshi ham juda kam.
“Jurnalistlarning aksariyati nari borsa, 1,5—2 million so‘m maosh olishadi. Balki undan ham kamdir. Shu maoshni ham ularga ko‘p ko‘rishdi, shekilli. Viloyat hokimining gazetaga eʼtibori umuman yo‘q hisobi”, — deydi manba.
Manbaning hisob-kitobiga ko‘ra, tahririyatning yillik xarajatlari nari borsa 300-400 million so‘mni tashkil etadi.
“Kimdir aytishi mumkin, Sirdaryo viloyatining iqtisodiy ahvoli boshqa viloyatlarga nisbatan ancha past deb. Lekin shu daromadi kam viloyat ham yiliga 700-800 million dollarlik eksportni amalga oshirmoqda. Qanchadan qancha ishlab chiqarishlari bor. Nahotki tahririyat jamoasini qo‘llab-quvvatlash uchun yiliga hech bo‘lmasa jami xarajatlarning yarmini qoplash imkoni bo‘lmasa?” — deydi u.
Sirdaryo viloyati hokimi Akmaljon Mahmudaliyevning matbuot kotibi Zafar Mirrahimov “Daryo” jurnalisti bilan bu haqda suhbatlashar ekan, hokimning tahririyatga eʼtibori juda yaxshi ekanligini taʼkidladi.
“Viloyat hokimi endi ish boshlagan payt, yil boshida ham tahririyat jamoasi bilan ko‘rishib, kamchiliklari borasida so‘ragandi. Va ularga ko‘mak berilishini, matbuot markazi ham tashkil etilishini aytgandi. Buy yil Sirdaryo viloyatining 60 yillik yubileyi nishonlanayotgani bois gazeta ham o‘shanda tashkil etilgani inobatga olinib, gazetaning ham 60 yillik yubileyini nishonladik. Shu munosabat bilan viloyat hokimi tahririyat jamoasi bilan ko‘rishib, imkon qadar ularga sovg‘a-salomlar ulashdi. Yana bir bor ularni qo‘llab-quvvatlashini aytdi”, — deydi hokimlik axborot xizmati rahbari.
Zafar Mirrahimovning qo‘shimcha qilishicha, viloyat hokimi tahririyat jamoasi bilan suhbatlashganidan so‘ng homiylik mablag‘lari hisobidan 200 million so‘m miqdorida mablag‘ berilishini bildirgan.
Gazeta bosh muharriri Muhammad Ismoilov 200 million so‘m miqdoridagi mablag‘ vaʼda qilinganini tasdiqladi. Ammo hozircha bu mablag‘dan darak yo‘qligini aytdi.
“Haqiqatan ham, viloyat rahbari iyun oyining boshida tahririyat jamoasi bilan uchrashganida qo‘llab-quvvatlash uchun 200 million so‘m miqdorida mablag‘ berilishini aytgandi”, — deydi bosh muharrir.
Gazeta mas’uli hokim vaʼda qilgan mablag‘dan oz miqdorda bo‘lsa-da, berildimi, degan savolga, yo‘q deb javob berdi.
Zafar Mirrahimov bu holatga izoh berar ekan, mablag‘ni to‘plash va uni tahririyat jamoasiga berish kechikayotganini tan oldi. Va tez orada vaʼda qilingan mablag‘ berilishini, tahririyat jamoasi esa yana ishga qaytishidan umidvorligini qo‘shimcha qildi.
“Daryo” voqealar rivojini kuzatishda davom etadi.
Izoh (0)