Сирдарё вилояти ҳокимлигининг 60 йиллик нашрлари — “Янги Сирдарё” ва “Новая Сирдаря” газеталари жамоаси иқтисодий танглик сабаб ёппасига таътилга чиқди. Бу ҳақдаги хабарни “Дарё” журналисти билан суҳбатлашган таҳририятлар бош муҳаррири Муҳаммад Исмоилов тасдиқлади.
Бош муҳаррирга кўра, таҳририятларнинг 12 нафар ходими 2023 йилнинг 15 июнь кунидан бошлаб меҳнат таътилида.
“Иқтисодий аҳвол сабаб шу қарорга келдик. Бир ойдан сўнг яна фаолиятимизни давом эттирамиз, деган ниятдамиз. Вилоят ҳокими шу йилнинг февраль ойида ҳам, куни кеча июнь ойининг бошида ҳам таҳририят жамоаси билан кўришиб, қўллаб-қувватлашини билдирган”, — дейди газета бош муҳаррири.
“Дарё” мухбири билан суҳбатлашган бошқа манбанинг айтишича, газета жамоасининг бир ойлик таътилдан қайтиши даргумон.
“Газетанинг аҳволи жуда оғир. Вилоят ҳокими газетани қўллаб-қувватлайман деганига 4-5 ой бўлди. Лекин шу муддат ичида таҳририятга бир сўм ҳам бермаган. Қандай қилиб жамоанинг сақланиб қолишидан умид қилиш мумкин?” — дейди газета жамоасига яқин манба.
Манбанинг айтишича, аслида газета журналистларининг маоши ҳам жуда кам.
“Журналистларнинг аксарияти нари борса, 1,5—2 миллион сўм маош олишади. Балки ундан ҳам камдир. Шу маошни ҳам уларга кўп кўришди, шекилли. Вилоят ҳокимининг газетага эътибори умуман йўқ ҳисоби”, — дейди манба.
Манбанинг ҳисоб-китобига кўра, таҳририятнинг йиллик харажатлари нари борса 300-400 миллион сўмни ташкил этади.
“Кимдир айтиши мумкин, Сирдарё вилоятининг иқтисодий аҳволи бошқа вилоятларга нисбатан анча паст деб. Лекин шу даромади кам вилоят ҳам йилига 700-800 миллион долларлик экспортни амалга оширмоқда. Қанчадан қанча ишлаб чиқаришлари бор. Наҳотки таҳририят жамоасини қўллаб-қувватлаш учун йилига ҳеч бўлмаса жами харажатларнинг ярмини қоплаш имкони бўлмаса?” — дейди у.
Сирдарё вилояти ҳокими Акмалжон Маҳмудалиевнинг матбуот котиби Зафар Мирраҳимов “Дарё” журналисти билан бу ҳақда суҳбатлашар экан, ҳокимнинг таҳририятга эътибори жуда яхши эканлигини таъкидлади.
“Вилоят ҳокими энди иш бошлаган пайт, йил бошида ҳам таҳририят жамоаси билан кўришиб, камчиликлари борасида сўраганди. Ва уларга кўмак берилишини, матбуот маркази ҳам ташкил этилишини айтганди. Буй йил Сирдарё вилоятининг 60 йиллик юбилейи нишонланаётгани боис газета ҳам ўшанда ташкил этилгани инобатга олиниб, газетанинг ҳам 60 йиллик юбилейини нишонладик. Шу муносабат билан вилоят ҳокими таҳририят жамоаси билан кўришиб, имкон қадар уларга совға-саломлар улашди. Яна бир бор уларни қўллаб-қувватлашини айтди”, — дейди ҳокимлик ахборот хизмати раҳбари.
Зафар Мирраҳимовнинг қўшимча қилишича, вилоят ҳокими таҳририят жамоаси билан суҳбатлашганидан сўнг ҳомийлик маблағлари ҳисобидан 200 миллион сўм миқдорида маблағ берилишини билдирган.
Газета бош муҳаррири Муҳаммад Исмоилов 200 миллион сўм миқдоридаги маблағ ваъда қилинганини тасдиқлади. Аммо ҳозирча бу маблағдан дарак йўқлигини айтди.
“Ҳақиқатан ҳам, вилоят раҳбари июнь ойининг бошида таҳририят жамоаси билан учрашганида қўллаб-қувватлаш учун 200 миллион сўм миқдорида маблағ берилишини айтганди”, — дейди бош муҳаррир.
Газета масъули ҳоким ваъда қилган маблағдан оз миқдорда бўлса-да, берилдими, деган саволга, йўқ деб жавоб берди.
Зафар Мирраҳимов бу ҳолатга изоҳ берар экан, маблағни тўплаш ва уни таҳририят жамоасига бериш кечикаётганини тан олди. Ва тез орада ваъда қилинган маблағ берилишини, таҳририят жамоаси эса яна ишга қайтишидан умидворлигини қўшимча қилди.
“Дарё” воқеалар ривожини кузатишда давом этади.
Изоҳ (0)