Nissan Motor Co kompaniyasining sobiq rahbari Karlos Gon yapon avtomobil ishlab chiqaruvchisiga qarshi da’vo arizasini sudga kiritdi. U Nissan kompaniyasidan 1 milliard dollar tovon puli talab qilmoqda.
Livan kassatsiya sudiga berilgan da’voda qayd etilishicha, Gonning Nissan kompaniyasidan bo‘shatilishi va keyinchalik hibsga olinishi uning moliyaviy ahvoli va obro‘siga “katta zarar yetkazgan”.
“Menga nisbatan qo‘yilgan jiddiy ayblovlar yillar davomida odamlarning ongida qoladi”, — dedi Gon da’vo arizasida.
Uning ta’kidlashicha, ayblovlar faqat shubhalarga asoslangan bo‘lsa-da, ular sababli “umrining oxiriga qadar azob chekadi”.
Yigirma yil oldin Gon Nissan kompaniyasini inqirozdan qutqarib qolgan. U yapon kompaniyasini fransuzlarning Renault zavodi bilan birlashtirish tashabbuskorlaridan biri edi. Karlos Gon o‘z vaqtida har ikkala kompaniyani boshqargan.
Jahon avtomobilsozlik sanoatining eng mashhur top-menejerlaridan biri 2018-yilning noyabr oyida Tokioda daromadlarini yashirishda ayblanib, hibsga olingan va deyarli to‘rt oy qamoqda o‘tirgan.
Nissan Gon hibsga olinganidan uch kun o‘tib, uni direktorlar kengashi raisi lavozimidan bo‘shatish to‘g‘risida qaror qabul qildi. 2019-yilning yanvarida esa u Renault direktorlar kengashi raisi va bosh ijrochi direktori lavozimini ham tark etdi.
Gon 2019-yilning martida 8,9 million dollar garov evaziga ozod etilgan va o‘sha yilning dekabrida Yaponiyadan Livanga qochib ketgan.
Izoh (0)