Nissan Motor Cо компаниясининг собиқ раҳбари Карлос Гон япон автомобиль ишлаб чиқарувчисига қарши даъво аризасини судга киритди. У Nissan компаниясидан 1 миллиард доллар товон пули талаб қилмоқда.
Ливан кассация судига берилган даъвода қайд этилишича, Гоннинг Nissan компаниясидан бўшатилиши ва кейинчалик ҳибсга олиниши унинг молиявий аҳволи ва обрўсига “катта зарар етказган”.
“Менга нисбатан қўйилган жиддий айбловлар йиллар давомида одамларнинг онгида қолади”, — деди Гон даъво аризасида.
Унинг таъкидлашича, айбловлар фақат шубҳаларга асосланган бўлса-да, улар сабабли “умрининг охирига қадар азоб чекади”.
Йигирма йил олдин Гон Nissan компаниясини инқироздан қутқариб қолган. У япон компаниясини французларнинг Renault заводи билан бирлаштириш ташаббускорларидан бири эди. Карлос Гон ўз вақтида ҳар иккала компанияни бошқарган.
Жаҳон автомобилсозлик саноатининг энг машҳур топ-менежерларидан бири 2018 йилнинг ноябрь ойида Токиода даромадларини яширишда айбланиб, ҳибсга олинган ва деярли тўрт ой қамоқда ўтирган.
Nissan Гон ҳибсга олинганидан уч кун ўтиб, уни директорлар кенгаши раиси лавозимидан бўшатиш тўғрисида қарор қабул қилди. 2019 йилнинг январида эса у Renault директорлар кенгаши раиси ва бош ижрочи директори лавозимини ҳам тарк этди.
Гон 2019 йилнинг мартида 8,9 миллион доллар гаров эвазига озод этилган ва ўша йилнинг декабрида Япониядан Ливанга қочиб кетган.
Изоҳ (0)