Moskva viloyatining Ximki shahar sudi 2019-yilda Sheremetyevo aeroportiga favqulodda qo‘nish chog‘ida yonib ketgan Sukhoi Superjet 100 samolyoti uchuvchi-komandiri Denis Yevdokimovni olti yilga koloniyaga hukm qildi, deb yozadi “TASS”.
Sud Yevdokimovni ikki yoki undan ortiq kishining o‘limiga sabab bo‘lgan yo‘l harakati xavfsizligi qoidalarini buzish moddasi bo‘yicha aybdor deb topdi. Uchuvchiga aynan prokuratura talab qilgan jazo berildi.
Prokuratura maʼlumotlariga ko‘ra, Yevdokimov boshqargan samolyot yetarlicha muvozanatga ega bo‘lmagan, qo‘nish jarayoni haddan tashqari yuklanish bilan amalga oshirilgan, aviakema komandiri “favqulodda vaziyatni his qilmagan va favqulodda holat kodini o‘rnatmagan”.
2019-yilning 5-may kuni Moskvadan Murmanskka uchayotgan Aeroflot Sukhoi Superjet 100 samolyoti Sheremetyevoga favqulodda qo‘ngan edi. Samolyot qo‘nayotganda yonib ketgan. Bortdagi 78 kishidan 41 nafari halok bo‘lgan.
Oktabr oyida Rossiya Tergov qo‘mitasi Denis Yevdokimovni ehtiyotsizlik oqibatida ikki yoki undan ortiq odamning o‘limiga sabab bo‘lgan havo harakati qoidalarini buzganlikda aybladi.
Yevdokimov aybini tan olishdan bosh tortdi. Uning ta’kidlashicha, samolyot korpusi yong‘inga uzoq vaqt bardosh bera olardi, ammo kimdir orqa eshikni ochgani sababli havo oqimi urib, olov tezda salonga tarqalgan. Hodisada yo‘lovchilar old eshiklardan evakuatsiya qilingan.
Izoh (0)