AQSH prezidenti Jo Bayden Rossiya prezidenti Vladimir Putin tomonidan taktik yadroviy quroldan foydalanish tahdidi “real” ekanini aytdi.
Avvalroq Oq uy rahbari Rossiyaning Belarusda bunday qurollarni joylashtirganini qoralab, Putinning bayonotini “mutlaqo mas’uliyatsizlik” deb atagan edi, deb yozadi Reuters.
“Ikki yilcha oldin bu yerda bo‘lib, Kolorado daryosining qurib ketishidan xavotirda ekanimni aytganimda, hamma menga aqldan ozgan odamga qaragandek qaragan. Putinning taktik yadro qurolini qo‘llashidan xavotirdaligimni aytganimda ham ular menga xuddi shunday qaradi. Bu real”, — dedi Bayden Kaliforniyadagi donorlar guruhi bilan uchrashuvda.
O‘tgan hafta Aleksandr Lukashenko Belarus Rossiyaning taktik yadroviy qurollarini qabul qilishni boshlaganini, ularning ba’zilari AQSHning 1945-yilda Xirosima va Nagasakiga tashlagan atom bombalaridan uch baravar kuchliroq ekanini aytdi. Keyinroq Putin yadroviy zaryadlarning birinchi partiyasi Belarusga yetkazilganini, qolganlarini 2023-yil oxirigacha ko‘chirish rejalashtirilayotganini ma’lum qildi.
Bu Rossiyaning Sovet Ittifoqi parchalanganidan keyin birinchi marta qisqa masofali yadro qurollarini o‘z hududidan tashqarida joylashtirishi.
Moskva Minskka yadroviy qurol tashishga qodir “Iskandar” raketa tizimini ham topshirgan va Belarus samolyotlarini maxsus o‘q-dorilardan foydalanish uchun qayta jihozlashda yordam bergan. Shuningdek, Belarus harbiy xizmatchilari Rossiyada tegishli tayyorgarlikdan o‘tkazilgan.
Izoh (0)