“Britaniyalik milliarder Richard Brensonga tegishli Amerikaning Virgin Galactic aerokosmik kompaniyasi iyun oxirida koinotga tijoriy parvozni amalga oshiradi”, — deyiladi kompaniya bayonotida.
Birinchi parvoz 27–30-iyun kunlariga mo‘ljallangan bo‘lib, u mikrogravitatsiya bilan bog‘liq ilmiy tadqiqotlarga yo‘naltiriladi. Debyut missiyasi doirasida Italiya harbiy-havo kuchlari va mamlakat milliy tadqiqot kengashining uch nafar vakili koinotga uchadi.
“Missiya ‘Virgin Galactic noyob suborbital ilmiy laboratoriyasining ahamiyati va kuchini’ namoyish etadi”, deyiladi xabarda.
Avgust oyi boshida xususiy astronavtlar koinotga uchishadi. Keyinroq esa parvozlar har oy amalga oshiriladi.
Galactic 01 va Galactic 02 deb nomlangan dastlabki ikkita missiya kompaniya veb-saytida jonli efirda namoyish etiladi.
Mazkur xabar fonida Nyu-York birjasidagi qo‘shimcha savdolarda Virgin Galactic aksiyalari narxi 44 foizga oshdi.
Virgin Galactic kompaniyasiga 2004-yilda britaniyalik tadbirkor ser Richard Brenson tomonidan asos solingan.
2007-yil fevral oyida Virgin Galactic va NASA rasmiylari o‘zaro hamkorlik bo‘yicha memorandum imzoladilar.
2009-yil davomida kompaniyaga 450 dan ortiq kishi koinotga parvoz qilish uchun ariza topshirdi. Ulardan 150 nafari depozit uchun pul ham to‘lagan. O‘sha vaqtda koinotga uchish uchun bitta chipta narxi 250 000 dollarni tashkil qilgan.
Izoh (0)