“Umuman olganda ijobiy, ammo og‘ir”. Zelenskiy frontdagi vaziyatni ma’lum qildi

Ukraina qo‘shinlari frontda Rossiya armiyasining qattiq qarshiligiga duch kelmoqda, dedi Ukraina prezidenti Vladimir Zelenskiy Amerikaning NBC News telekanaliga bergan intervyusida.

“Ishlar yaxshi ketmoqda. Men buni umuman olganda, ijobiy deb aytgan bo‘lardim, lekin juda og‘ir. Oldingi chiziqdagi qo‘shinlarimiz qattiq qarshilikka duch kelmoqda. Chunki Rossiya uchun Ukrainadagi ushbu kampaniyada mag‘lub bo‘lish aslida urushda mag‘lub bo‘lishni anglatadi”, — dedi Zalenskiy jurnalistning qarshi hujum haqidagi savoliga javoban.

U hujum operatsiyasi tafsilotlarini oshkor etishdan bosh tortdi.

Ukraina prezidenti yana bir bor G‘arb ittifoqchilarini harbiy yordam ko‘rsatish, xususan, samolyotlar yetkazib berish va ukrainalik uchuvchilarni tayyorlashni kechiktirmaslikka chaqirdi.

“Byurokratiya borligini tushunaman. Ammo biz vaqt yo‘qotyapmiz, odamlarni yo‘qotyapmiz va eng muhimi, o‘z ustunligimizni boy beryapmiz”, — dedi Zelenskiy. “Ukraina havoda ham raqobatlasha olishni xohlaydi, keling, bugun buni ro‘yobga chiqaramiz”.

Zelenskiyning so‘zlariga ko‘ra, agar Rossiya Ukrainani bosib olsa, u yanada ko‘proq yerga – “Boltiqbo‘yi mamlakatlariga, Polshaga, istalgan NATO davlatiga” o‘tadi. Bu holatda AQSH NATOni parchalash yoki urush o‘rtasida tanlov qilishiga majbur bo‘ladi, deb hisoblamoqda Ukraina prezidenti.

Ukraina frontda qarshi hujum boshlanganini rasman e’lon qilmagan. Rossiya Mudofaa vazirligi Ukraina Qurolli kuchlarining hujumi 4-iyun kuni boshlanganini da’vo qilmoqda. 9-iyun kuni Rossiya prezidenti Vladimir Putin hujum paytida Ukraina Qurolli kuchlari frontning birorta sektorida o‘z oldiga qo‘yilgan vazifalarni bajara olmaganini aytdi.