Britaniyaning mashhur Daily Mail tabloidi birinchi sahifasida: “Ertagayoq: Bizning yangi bilimdon kolumnistimizni Vestminster va butun dunyo bo‘ylab o‘qishingiz mumkin” sarlavhasi bilan chiqdi.
Gazeta uning ismini oshkor qilmagan, biroq Britaniya OAVga ko‘ra, sarlavha yonidagi siluet Buyuk Britaniyaning sobiq bosh vaziri Boris Jonsonni anglatadi.
Politico o‘z manbalariga tayanib yozishicha, gazeta janob Jonsonga “olti raqamdan iborat juda yuqori summa” to‘lamoqchi.
Shu hafta boshida Buyuk Britaniya Jamoatchilik palatasining Imtiyozlar qo‘mitasi janob Jonsonga oid tergov natijalarini taqdim etdi. Qo‘mita Boris Jonson pandemiya paytidagi ziyofat mojarosi bilan bog‘liq holatni tekshirish jarayonida Britaniya sobiq Bosh vaziri “parlamentni ataylab chalg‘itishga uringan” degan xulosaga keldi.
Avvalroq, Boris Jonson Britaniya parlamenti deputatligidan ketishini ma’lum qilgandi. Bunga sabab qilib u Jamoatchilik palatasi qo‘mitasining pandemiya paytidagi ziyofat bilan bog‘liq holat bo‘yicha tayyorlagan hisobotini ko‘rsatgan.
“Ular hanuzgacha qasddan Jamoatchilik palatasini chalg‘itganim haqida hech qanday dalil keltirmadilar”, — degandi o‘shanda Jonson.
Izoh (0)