Microsoft asoschisi Bill Geyts Xitoy rahbari Si Szinpin bilan uchrashmoqchi, deb xabar berdi Deutsche Welle.
Geytsning Pekinda Si bilan uchrashishi haqida CCTV telekanali ma’lum qilgan. Bu milliarderning to‘rt yil ichida Xitoyga birinchi tashrifi bo‘ladi. Qayd etilishicha, uchrashuv yuzma-yuz formatda o‘tkazilishi mumkin.
Twitter’da Geytsning o‘zi Bill va Melinda Geyts fondi uchun “global sog‘liqni saqlash va rivojlanish masalalari ustida ishlovchi hamkorlar” bilan uchrashish maqsadida Pekinga kelganini yozdi.
Geyts COVID-19 bo‘yicha qat’iy cheklovlar olib tashlanganidan keyin Xitoyga tashrif buyurgan ilk G‘arb tadbirkorlaridan biri bo‘ldi. Bill va Melinda Geyts fondi Xitoyning bezgak va silga qarshi kurashdagi sa’y-harakatlarini qo‘llab-quvvatlash uchun 50 million dollar ajratishini ma’lum qilgandi.
Pekinda joylashgan Global salomatlik uchun dori moddalarini kashf qilish instituti (GHDDI) Bill Geyts, Pekin shahar hukumati va Sinxua universiteti tomonidan tashkil etilgan guruh bo‘lib, Geyts fondi GHDDI bilan hamkorlik yangilanganini e’lon qildi.
Geyts Pekinda sog‘liqni saqlash va rivojlanish bo‘yicha global hamkorlar bilan ham uchrashadi.
“Xitoy mamlakatda qashshoqlikni kamaytirish va sog‘liqni saqlash natijalarini yaxshilashda sezilarli yutuqlarga erishdi. Umid qilamanki, Xitoy hozirgi muammolarni, ayniqsa Afrika davlatlari duch kelayotgan muammolarni hal qilishda yanada kattaroq rol o‘ynay oladi”, — dedi Geyts.
Eslatib o‘tamiz, Geyts va Si 2015-yilda Xaynan provinsiyasida o‘tkazilgan siyosiy va biznes rahbarlarining Boao forumi doirasida uchrashgan edi. O‘shanda Xitoy tashqi ishlar vazirligi ular “sog‘liqni saqlash sohasini yaxshilash va qashshoqlikni kamaytirish” bo‘yicha fikr almashganini ma’lum qilgan.
Izoh (0)