Xitoy hukumati qariyalarga g‘amxo‘rlik qilish hamda tibbiy va ijtimoiy soha xodimlarining yetishmasligi muammosini millionlab robotlar ishlab chiqarish bilan hal qilmoqchi. Bu haqda Sixth Tone xabar berdi.
Xitoy milliy standartlariga ko‘ra, qariyalarni parvarishlash muassasalarida har to‘rt kishiga bir nafar qarovchi bo‘lishi kerak. Ammo hozirda qariyalar uylarining 8,1 million aholisiga atigi 320 ming kishi xizmat ko‘rsatmoqda.
Xitoyda yangi texnologiyalar ushbu og‘ir vaziyatni hal qilishga yordam beradi, deb umid qilinmoqda. Xitoyning IT gigantlari allaqachon sun’iy intellektga ega robotlar yaratishga kirishgan. Qariyalarga hamrohlik qiladigan robotlar qo‘shiq kuylash, muloqot qilish, reabilitatsiyada qatnashish va kino namoyish qilish qobiliyatlariga ega bo‘ladi.
Shuningdek, Xitoy hukumati qariyalar orasida aqlli texnologiyalarni yoyishni rag‘batlantirmoqda. Bularga salomatlikni kuzatuvchi va dori-darmonlarni qabul qilish haqida eslatib turuvchi soatlar, shuningdek, shifokor chaqirish, ob-havo prognozi va o‘yinlarga kirish uchun ishlatiladigan aqlli planshetlar kiradi.
Tahlilchilarning prognozlariga ko‘ra, Xitoy hukumati mablag‘ ajratishni oshirish, yangi mahsulotlarni ishlab chiqish va iste’mol modellarini o‘zgartirish natijasida keyingi o‘n yil ichida ijtimoiy texnologiyalar bozorida hammadan o‘zib ketadi.
- 2022-yilda Xitoy aholisi 1959—1961-yillardagi yirik ocharchilikdan keyin 60 yil ichida birinchi marta kamaydi. Aholining qariyb 15 foizi (209,78 million) 65 yoshdan oshgan fuqarolardir. Mehnatga layoqatli yoshdagilar (16 yoshdan 59 yoshgacha) 875,56 million kishini tashkil etdi, bu umumiy ko‘rsatkichning qariyb 62 foiziga teng.
Izoh (0)