Avstraliya Kanberradagi parlament binosi yaqinida Rossiyaning yangi elchixonasi qurilishini to‘xtatdi. Qonun 15-iyun, payshanba kuni bosh vazir Entoni Albaniz tomonidan ommaga e’lon qilinganidan keyin uch soat ichida parlamentning har ikki palatasi tomonidan qabul qilindi.
Albaniz bu harakatning sababini milliy xavfsizlikka tahdid bilan izohladi. Unga ko‘ra, yangi qonun xavfsizlik idoralari tavsiyalari asosida Rossiyaga yer uchastkasini ijaraga berishni bekor qiladi.
“Ijaraga olingan obyekt rasmiy diplomatik vakolatxonaga aylanmasligi uchun tezkor harakat qilmoqdamiz”, — dedi hukumat rahbari jurnalistlarga.
Vazir gap Avstraliyada Rossiya diplomatik missiyasining paydo bo‘lishiga yo‘l qo‘ymaslik haqida ketmayotganini ta’kidladi — uning so‘zlariga ko‘ra, elchixona binosini parlamentga yaqin joyda joylashtirish shunchaki maqbul emas. Entoni Albaniz Rossiya obyektining ro‘parasida joylashgan Xitoy elchixonasi bilan bog‘liq xavfsizlikka tahdid bormi, degan savolga javob berishdan qochdi, deb yozadi AP.
Avstraliya bosh vaziri uning hukumati Rossiyaning “Ukrainaga noqonuniy va axloqsizlarcha bosqinini” qoralashini aytdi.
Qabul qilingan qonun, general-gubernator Devid Xerli tomonidan ma’qullangan kundan boshlab kuchga kirishi kutilmoqda.
Izoh (0)