Австралия Канберрадаги парламент биноси яқинида Россиянинг янги элчихонаси қурилишини тўхтатди. Қонун 15 июнь, пайшанба куни бош вазир Энтони Албаниз томонидан оммага эълон қилинганидан кейин уч соат ичида парламентнинг ҳар икки палатаси томонидан қабул қилинди.
Албаниз бу ҳаракатнинг сабабини миллий хавфсизликка таҳдид билан изоҳлади. Унга кўра, янги қонун хавфсизлик идоралари тавсиялари асосида Россияга ер участкасини ижарага беришни бекор қилади.
“Ижарага олинган объект расмий дипломатик ваколатхонага айланмаслиги учун тезкор ҳаракат қилмоқдамиз”, — деди ҳукумат раҳбари журналистларга.
Вазир гап Австралияда Россия дипломатик миссиясининг пайдо бўлишига йўл қўймаслик ҳақида кетмаётганини таъкидлади — унинг сўзларига кўра, элчихона биносини парламентга яқин жойда жойлаштириш шунчаки мақбул эмас. Энтони Албаниз Россия объектининг рўпарасида жойлашган Хитой элчихонаси билан боғлиқ хавфсизликка таҳдид борми, деган саволга жавоб беришдан қочди, деб ёзади AP.
Австралия бош вазири унинг ҳукумати Россиянинг “Украинага ноқонуний ва ахлоқсизларча босқинини” қоралашини айтди.
Қабул қилинган қонун, генерал-губернатор Девид Херли томонидан маъқулланган кундан бошлаб кучга кириши кутилмоқда.
Изоҳ (0)