Shimoliy afrikalik muhojirlar o‘tirgan qayiq Gretsiya qirg‘oqlarida ag‘darilib ketdi. Gretsiyaning ERT telekanali xabariga ko‘ra, kamida 78 kishi halok bo‘lgan.
100 dan ortiq odam qutqarib olindi. Qayiq bortida necha kishi bo‘lgani noma’lum. Xalqaro migratsiya tashkiloti 400 ga yaqin odamni bo‘lgan deb taxmin qilmoqda. Gretsiya hukumati esa omon qolganlarning so‘zlariga tayanib, bortda 700 ga yaqin muhojir bo‘lganini ta’kidlamoqda.
Qayiq taxminan 10-iyun kuni Liviyadan Italiyaga yo‘lga chiqqan. U Pilos shahri yaqinidagi xalqaro suvlarda cho‘kib ketgan. Rasmiylarning fikricha, hodisaga kemaning haddan ziyod ko‘p odamni olib ketayotgani sabab bo‘lgan.
Halokat yuz bergan hududda qidiruv-qutqaruv operatsiyasi davom etmoqda, bu ishga Sohil Xavfsizlik xizmati va favqulodda yordam qayiqlari, harbiy fregat, Harbiy-havo kuchlari vertolyoti, dron va xususiy kemalar jalb qilingan.
Yevropaga kelayotgan noqonuniy muhojirlar dengizda halok bo‘lmoqda
Shimoliy Afrika va Yaqin Sharqdan Yevropa Ittifoqi mamlakatlariga borishga harakat qilayotgan muhojirlar uchun asosiy manzil Gretsiya va Italiya hisoblanadi. Ularning ko‘pchiligi xavfsizlik uskunalarisiz O‘rta Yer dengizini haddan ortiq yuklangan qayiqlarda kesib o‘tadi.
2023-yil fevralida Italiya qirg‘oqlarida Eron, Pokiston va Afg‘onistondan kelgan muhojirlarni olib ketayotgan kema halokatga uchragan edi. O‘shanda kamida 40 kishi halok bo‘lgan.
Missing Migrants Project xalqaro tashkilotiga ko‘ra, 2014-yildan buyon 27 mingga yaqin odam O‘rta Yer dengizida halok bo‘lgan yoki bedarak yo‘qolgan.
Izoh (0)