Oq uy Eronning yadro qurolini qo‘lga kiritish ehtimolini kamaytirish hamda Eron qamoqxonalaridagi amerikaliklarni ozod qilish uchun Tehron bilan yashirincha muzokaralarni davom ettirmoqda. Bu haqda The Wall Street Journal manbalarga tayanib xabar berdi. Ularning aytishicha, dekabr oyidan beri Ummon AQSH va Eron o‘rtasida bilvosita muzokaralarga vositachilik qilmoqda.
Xalqaro sanksiyalar va Eron banklarining SWIFT global to‘lov tizimidan uzib qo‘yilishi fonida Tehron uchun eng muhimi — muzlatilgan aktivlarini blokdan chiqarishga erishish. Gazetaning yozishicha, Eron rasmiylari amerikalik mahbuslarni ozod qilish va mamlakatda yadro quroli yo‘qligini isbotlash evaziga aynan shuni kutmoqda.
AQSH prezidenti ma’muriyati rasman Eron bilan barcha aloqalarni rad etib keladi, chunki bu Jo Baydenning saylovoldi kampaniyasiga putur yetkazishi mumkin, deb yozadi The Wall Street Journal.
Avvalroq Birlashgan Millatlar Tashkiloti Xalqaro sudi Eronning xorijiy aktivlarni muzlatish masalasida AQSHga qarshi da’vosini qisman qanoatlantirgan edi. Endi Vashington Tehronga kompensatsiya to‘lashi kerak.
Sud instansiyasi xulosasiga ko‘ra, Qo‘shma Shtatlar Eronning xorijiy aktivlarini muzlatib, 1955-yilda mamlakatlar o‘rtasida tuzilgan do‘stlik shartnomasi bo‘yicha o‘z majburiyatlarini buzgan. Shu bilan birga, Eron va AQSH o‘rtasidagi munosabatlar 1979-yilgi Islom inqilobidan keyin dushmanlik tusini olgan, AQSH kelishuvdan faqat 2018-yilda — ko‘plab sanksiyalar paketi kiritilgandan keyin chiqishga qaror qilgandi.
Sud Vashingtonning do‘stlik kelishuvidan chiqmasdan turib ayrim Eron kompaniyalari aktivlarini muzlatib qo‘ygani, ya’ni “noqonuniy sanksiyalar” uchun Tehronga tovon puli to‘lashi haqida hukm chiqardi.
Izoh (0)