AQSH prezidenti Jo Bayden Belarus hukumatining qator aʼzolariga nisbatan sanksiyalarni bir yilga uzaytirdi, cheklovlar 2023-yil 16-iyundan keyin ham amal qiladi, deb xabar berdi Oq uy matbuot xizmati.
“Belarus hukumatining ayrim a’zolari va boshqa mansabdorlarning harakatlari va siyosati, shuningdek, Belarus rejimining zararli faoliyati va uzoq yillardan beri o‘z vakolatlarini suiiste’mol qilishi AQSH milliy xavfsizligi va tashqi siyosatiga g‘ayrioddiy va favqulodda xavf tug‘dirishda davom etmoqda”, — deydi Bayden o‘z bayonotida.
Oq uy Belarusga qarshi ilk sanksiyalar 2006-yilda, o‘sha yili bo‘lib o‘tgan “nodemokratik saylovlar”, inson huquqlarining buzilishi, “siyosiy repressiya” va korrupsiya munosabati bilan kiritilganini eslatdi. 2006-yilda Vashington, boshqalar qatorida, Belarus prezidenti Aleksandr Lukashenkoga (o‘shanda u uchinchi marta davlat rahbari lavozimini egalladi) qarshi sanksiyalar kiritgan.
2021-yilda Vashington 2020-yil avgustida bo‘lib o‘tgan prezidentlik saylovlaridan so‘ng (o‘shanda Lukashenkoning navbatdagi g‘alabasidan keyin Belarusda norozilik namoyishlari bo‘lib o‘tgan) respublika hukumatiga qarshi sanksiyalarni kengaytirdi. O‘sha yili cheklovlar Belarus rasmiylari va davlat idoralari, energetika va moliya tashkilotlari va ularning rahbarlariga ta’sir ko‘rsatdi. Belarus prezidenti G‘arb davlatlari joriy etgan sanksiyalarni izohlar ekan, ularni “banditlarcha” deb atagan
Biroq 2023-yil yanvarida u AQSH va G‘arb davlatlariga sanksiyalar uchun “minnatdorlik” bildirishga qaror qildi.
“Amerikaliklar va butun G‘arb dunyosiga bizga qarshi sanksiyalar qo‘ygani uchun minnatdorlik bildirmoqchiman. Aks holda bu ulkan maydonda Belarus traktorlari emas, Amerika va Germaniya traktorlari turgan bo‘lardi”, — dedi Lukashenko Zimbabve rahbariyatiga Belarus texnikasini topshirish marosimida.
Izoh (0)