Rossiyaning taktik yadroviy qurollarini Belarusda joylashtirish 7-8-iyul kunlari ular uchun inshootlarni tayyorlash tugagandan so‘ng darhol boshlanadi. Bu haqda “RBK” xabar berdi.
Rossiya prezidenti Vladimir Putin 9-iyun kuni Sochida Aleksandr Lukashenko bilan uchrashuvda bu haqda gapirdi. Putin xavfsizlik nuqtai nazaridan vaziyat barqarorligi, “hatto yaxshi” ekanini aytdi. U Rossiya va Belarus bu sohada ishonchli hamkorlik qilayotganini ta’kidladi.
Bungacha Rossiya prezidenti Moskva Belarusda yadroviy qurol saqlash ombori qurilishini 1-iyulga qadar yakunlashini aytgan edi.
Belarusda yadroviy qurol joylashtirilishi
25-may kuni Minskda Rossiya mudofaa vaziri Sergey Shoygu va Belarus mudofaa vazirligi rahbari Viktor Xrenin o‘rtasida uchrashuv bo‘lib o‘tdi, unda strategik bo‘lmagan yadro qurollarini Belarus Respublikasiga joylashtirish to‘g‘risidagi hujjat imzolandi.
“Rossiya Belarusga yadro qurolini bermayapti: ular ustidan nazorat va ulardan foydalanish bo‘yicha qaror Rossiya tomonida qoladi”, — dedi Shoygu.
Shuningdek, u, Moskva harbiy-siyosiy vaziyatni hisobga olgan holda, kelajakda “Ittifoq davlati xavfsizligini taʼminlash bo‘yicha qo‘shimcha choralar” ko‘rish niyatida ekanini aytdi. Rossiya mudofaa vaziri allaqachon ko‘rilgan choralar barcha mavjud xalqaro-huquqiy majburiyatlarga mos kelishini bildirdi.
O‘sha kuni Aleksandr Lukashenko Minsk Rossiyadan kelayotgan yadro qurollari xavfsizligi uchun mas’ul ekanini ta’kidladi va uning mamlakati hududiga hech qanday diversantlar kira olmasligini aytdi.
26-may kuni Ukraina prezidenti devoni rahbari maslahatchisi Mixail Podolyak Rossiyaning qo‘shni Belarusda yadro qurolini joylashtirishi Yadro qurolini tarqatmaslik to‘g‘risidagi shartnomani buzish ekanini bildirdi.
Izoh (0)