Ukrainaning NATOga kirishi yo‘lidagi asosiy to‘siq Vengriya yoki Rossiyaning pozitsiyasi emas, balki alyans aʼzolarining qurolli to‘qnashuv holatida bo‘lgan davlatni qabul qilish bo‘yicha ichki muhokamasi hisoblanadi. Bu haqda Latviya prezidenti Edgar Rinkevich “Ukrainskaya pravda” gazetasiga bergan intervyusida aytib o‘tdi.
Siyosatchining tushuntirishicha, NATO nizomining jamoaviy mudofaasi belgilab qo‘yilgan beshinchi modda sabab alyansning aksariyat davlatlari hukumatlari bu holatda nima qilish kerakligini bilmayapti.
“Ochig‘ini aytganda, asosiy savol shu. Va bu savolga alyansga a’zo davlatlarning ko‘pchiligi javob bera olmaydi. Ular o‘zlari uchun javob topmaguncha, NATOning boshqa a’zolari bilan bir stolda javob bera olmaydi”, — deya qo‘shimcha qildi Rinkevich.
Latviya prezidenti Riga Ukrainaning NATOga qo‘shilishini qo‘llab-quvvatlashi va bunga ko‘maklashish niyatida ekanini taʼkidladi. Uning fikricha, “yakuniy qaror qabul qilish” vaqti kelganida, qolgan davlatlar ham buni maʼqullaydi.
Ma’lumot uchun NATO nizomining beshinchi moddasi NATOning jamoaviy mudofaa tamoyiliga bag‘ishlangan. Unga ko‘ra, alyans a’zolaridan biriga qilingan hujum NATOning barcha a’zolariga qilingan hujum sifatida baholanadi.
Kiyev Rossiya bosqini boshlanganidan so‘ng NATOga qo‘shilish sa’y-harakatlarini kuchaytirdi, ammo alyansga qo‘shilish Moskva bilan mojaro tugamaguncha amalga oshmasligini tan oldi. Unga qadar G‘arb davlatlari Ukrainaga xavfsizlik kafolatlarini berishi kerak, dedi Vladimir Zelenskiy. Kiyevning qayd etishicha, Ukrainaning arizasini 20 ta davlat (alyansda 31 ta davlat bor) ma’qullagan.
Izoh (0)