“Yevropa Ittifoqi Ukrainadagi mojaro bir necha yil davom etishiga tayyorlanmoqda” — Yevrokomissar Terri Breton

Yevropa Ittifoqi Ukrainadagi jangovar harakatlar bir necha yilga cho‘zilishiga tayyorgarlik ko‘rmoqda, dedi ichki bozor bo‘yicha Yevrokomissar Terri Breton.

Uning ishonchi komilki, Rossiyaga qarshi sanksiyalar joriy etish imkoniyatlari hali tugamagan.

“Biz bu urush uzoq davom etishiga tayyorlanyapmiz. Afsuski, Yevropada jangovar harakatlar intensiv bo‘lgan urushlar ilgari bir necha yil davom etgan. Shuning uchun biz bunga tayyorlanyapmiz ”, — dedi janob Breton RMC radiosi efirida.

Uning so‘zlariga ko‘ra, “hech kim cheklov choralari tufayli Ukraina g‘alaba qozonadi, deb hisoblamayapti”. Terri Bretonning ishonchi komilki, “Agar Ukraina qachondir g‘alaba qozonsa, bu harbiy yo‘l bilan bo‘ladi”, “Ukraina asossiz bosib olingan hududlarni” qaytarib oladi.

“Shuning uchun Yevropa Ittifoqi va Ukraina ittifoqchilari unga g‘alaba qozonish uchun zarur bo‘lgan hamma narsani bermoqda”, — deya qo‘shimcha qildi u.