Yevrokomissiya rahbari Ursula fon der Lyayen, Italiya bosh vaziri Jorja Meloni va Niderlandiya bosh vaziri Mark Ryutte 11-iyun, yakshanba kuni Tunis prezidenti Qays Said bilan uchrashdi. Yevropalik siyosatchilarning Shimoliy Afrika davlatiga tashrifidan maqsad — Yevropaga qochqinlar va muhojirlar oqimining oldini olish borasida rasmiylar bilan kelishib olish edi.
Shartnoma tuzish uchun Yevrokomissiya rahbari Ursula fon der Lyayen Tunisga “mustahkam hamkorlik” va milliard yevrodan ortiq moliyaviy yordam va’da qildi. YI bu summadan 150 million yevroni hoziroq ajratishi mumkin, qolgan 900 millionini esa keyinroq uzoq muddatli yordam sifatida taqdim etadi, deb uning so‘zlaridan iqtibos keltirgan AFP axborot agentligi. Yevrokomissiya rahbari kelishuv iyun oxiriga rejalashtirilgan YI sammiti oldidan imzolanishini istamoqda.
Yevropa Ittifoqi boshqa Afrika davlatlari bilan ham xuddi shunday shartnomalar tuzgan. Xususan, ittifoq qochqinlar o‘tirgan qayiqlarni muntazam ravishda ushlab qoladigan va odamlarni vaqtincha saqlash lagerlariga jo‘natadigan Liviya qirg‘oq xavfsizliginining ishini qo‘llab-quvvatlaydi. Qochqinlar huquqlarini himoya qilish tashkilotlari va faollar bunday lagerlarni g‘ayriinsoniy sharoiti uchun tanqid qilgan. Shuningdek, muhojirlarga nisbatan tazyiqlar va zo‘ravonliklar qo‘llanilgani haqida xabarlar bor.
“Tunis Yevropaning chegara politsiyasi rolini o‘ynashga tayyor emas”
Yevropa delegatsiyasining tashrifi arafasida Tunis prezidenti Qays Said muhojirlar masalasida moliyaviy yordam zarurligini, biroq uning mamlakati Yevropaning chegara politsiyasi rolini o‘ynamasligini aytgan edi.
Oxirgi oylarda Yevropa Ittifoqiga Tunis orqali, jumladan, Afrikaning boshqa davlatlaridan noqonuniy kirib kelayotganlar soni keskin oshgan. Italiya ichki ishlar vazirligi ma’lumotlariga ko‘ra, yil boshidan beri mamlakatga 53 800 dan ortiq odam himoya izlab qayiqda kelgan. Bu ko‘rsatkich o‘tgan yilning shu davrida kelganlar sonidan qariyb yarim baravar ko‘p.
Izoh (0)