“Европа Иттифоқи Украинадаги можаро бир неча йил давом этишига тайёрланмоқда” — Еврокомиссар Терри Бретон

Европа Иттифоқи Украинадаги жанговар ҳаракатлар бир неча йилга чўзилишига тайёргарлик кўрмоқда, деди ички бозор бўйича Еврокомиссар Терри Бретон.

Унинг ишончи комилки, Россияга қарши санкциялар жорий этиш имкониятлари ҳали тугамаган.

“Биз бу уруш узоқ давом этишига тайёрланяпмиз. Афсуски, Европада жанговар ҳаракатлар интенсив бўлган урушлар илгари бир неча йил давом этган. Шунинг учун биз бунга тайёрланяпмиз ”, — деди жаноб Бретон RМC радиоси эфирида.

Унинг сўзларига кўра, “ҳеч ким чеклов чоралари туфайли Украина ғалаба қозонади, деб ҳисобламаяпти”. Терри Бретоннинг ишончи комилки, “Агар Украина қачондир ғалаба қозонса, бу ҳарбий йўл билан бўлади”, “Украина асоссиз босиб олинган ҳудудларни” қайтариб олади.

“Шунинг учун Европа Иттифоқи ва Украина иттифоқчилари унга ғалаба қозониш учун зарур бўлган ҳамма нарсани бермоқда”, — дея қўшимча қилди у.