Italiya sobiq bosh vaziri Silvio Berluskoni 86 yoshida vafot etdi, deb xabar bermoqda Corriere della Sera gazetasi 12-iyun, dushanba kuni. Buni sobiq bosh vazirning rasmiy vakili DPA va AFP agentligiga tasdiqladi. Avvalroq Italiya OAVlari Berluskoni og‘ir ahvolda shifoxonaga yetkazilgani haqida yozgandi.
1994-yilda Silvio Berluskoni “Olg‘a Italiya” (Forza Italia) partiyasini tuzgan va o‘sha yili saylovlarda g‘alaba qozonganidan so‘ng, o‘ng markazchi partiyalar koalitsiyasini tashkil qilgan. 1994-yil 11-mayda u bosh vazir sifatida qasamyod qilgan hamda Yevropaning birinchi milliarder yetakchisi bo‘lgan. Jami hisobda Silvio Berluskoni to‘rt marta Italiya bosh vaziri lavozimida ishlagan — oxirgi safar 2011-yilgacha. 2022-yil sentabr oyida u muddatidan oldin parlament saylovlaridan so‘ng Italiya Senatiga qaytdi.
Putinning eng yaqin do‘stlaridan biri
Berluskoni Rossiya prezidenti Vladimir Putinning eng yaqin do‘stlaridan biri hisoblanardi. Bundan tashqari, u Qrimning Rossiya tomonidan anneksiya qilinishini ochiq qo‘llab-quvvatlagan va yarim orolni Rossiyaning bir qismi sifatida tan olgan. 2015-yil sentabrida Qrimda Putin bilan uchrashgan. Rossiyaning Ukrainaga keng ko‘lamli bosqini boshlanganidan so‘ng, Berluskoni Putindan xafsalasi pir bo‘lganini aytdi, ammo urushda aybni Ukraina prezidenti Vladimir Zelenskiyga yukladi.
Berluskoni so‘nggi 30 yil ichida bir qancha operatsiyalarni, jumladan, prostata saratoni uchun jarrohlik amaliyotini boshdan kechirgan. 2016-yilda u murakkab yurak jarrohlik amaliyotini o‘tkazgan, 2020-yil sentabr oyida COVID-19 ning og‘ir shaklini yuqtirgan. 2023-yil aprel oyida OAV Silvio Berluskoni leykemiya bilan kasallangani va reanimatsiya bo‘limiga yotqizilgani haqida xabar berdi. Italiyaning ANSA agentligining yozishicha, u kimyoterapiya kursini boshlagan, muolajaning dastlabki bosqichi 5-aprel kuni shifoxonada o'tkazilgan.
Izoh (0)