Rus tilidan foydalanish qochqinlarning Polshada o‘z o‘rnini topishiga to‘sqinlik qilmoqda, dedi mamlakatdagi Ukrainlar ittifoqi rahbari Miroslav Skurka The Guardian nashriga.
“Rus tilida gaplashadigan belaruslar hech kim bilan muammoga duch kelmaydi, lekin ukrainlar haqida gap ketganda, odamlar bu siyosiy afzallikmi, deb hayron bo‘ladi. Ko‘pchilik (polyaklar) uchun ular nega ukrain yoki polyak tilini o‘rganmaganini tushunish qiyin bo‘ldi”, — dedi Skurka.
Ittifoq rahbarining qo‘shimcha qilishicha, Ukrainadagi urush “rus tilining muloqotda neytral til sifatidagi maqomini o‘ldirgan”. Uning so‘zlariga ko‘ra, Polshadagi Ukrainlar ittifoqiga yordam berishni istagan, ammo yordam olgan qochqinlar rus tilidan foydalanishni davom ettirayotganidan xavotir bildirgan polyaklar tomonidan ko‘plab shikoyatlar kelib tushgan. Shu munosabat bilan polshaliklarning ukrainlarga munosabati tobora salbiy bo‘lib bormoqda, dedi Skurka bahorda o‘tkazilgan ijtimoiy so‘rovga tayanib.
25-aprel kuni Skurka 2022-yilda rekord darajadagi chet el fuqarolari, asosan belaruslar va ukrainlar Polsha fuqaroligini olgani haqida ma’lum qilgandi. Xususan, o‘tgan yili 10 ming kishi Polsha pasportini oldi, ulardan 5,2 ming nafari Ukraina fuqarolari, 3 mingga yaqini belaruslar, 450 nafari rossiyaliklar edi. BMT Qochqinlar ishlari bo‘yicha Oliy komissar boshqarmasi ma’lumotlariga ko‘ra, 22-may holatiga Polshada 1,5 milliondan ortiq ukrainalik ro‘yxatga olingan.
Izoh (0)