Италия собиқ бош вазири Силвио Берлускони 86 ёшида вафот этди, деб хабар бермоқда Cорриэре делла Сера газетаси 12 июнь, душанба куни. Буни собиқ бош вазирнинг расмий вакили DPA ва AFP агентлигига тасдиқлади. Аввалроқ Италия ОАВлари Берлускони оғир аҳволда шифохонага етказилгани ҳақида ёзганди.
1994 йилда Силвио Берлускони “Олға Италия” (Forza Italia) партиясини тузган ва ўша йили сайловларда ғалаба қозонганидан сўнг, ўнг марказчи партиялар коалициясини ташкил қилган. 1994 йил 11 майда у бош вазир сифатида қасамёд қилган ҳамда Европанинг биринчи миллиардер етакчиси бўлган. Жами ҳисобда Силвио Берлускони тўрт марта Италия бош вазири лавозимида ишлаган — охирги сафар 2011 йилгача. 2022 йил сентябрь ойида у муддатидан олдин парламент сайловларидан сўнг Италия Сенатига қайтди.
Путиннинг энг яқин дўстларидан бири
Берлускони Россия президенти Владимир Путиннинг энг яқин дўстларидан бири ҳисобланарди. Бундан ташқари, у Қримнинг Россия томонидан аннексия қилинишини очиқ қўллаб-қувватлаган ва ярим оролни Россиянинг бир қисми сифатида тан олган. 2015 йил сентябрида Қримда Путин билан учрашган. Россиянинг Украинага кенг кўламли босқини бошланганидан сўнг, Берлускони Путиндан хафсаласи пир бўлганини айтди, аммо урушда айбни Украина президенти Владимир Зеленскийга юклади.
Берлускони сўнгги 30 йил ичида бир қанча операцияларни, жумладан, простата саратони учун жарроҳлик амалиётини бошдан кечирган. 2016 йилда у мураккаб юрак жарроҳлик амалиётини ўтказган, 2020 йил сентябрь ойида COVID-19 нинг оғир шаклини юқтирган. 2023 йил апрель ойида ОАВ Силвио Берлускони лейкемия билан касаллангани ва реанимация бўлимига ётқизилгани ҳақида хабар берди. Италиянинг ANSA агентлигининг ёзишича, у кимётерапия курсини бошлаган, муолажанинг дастлабки босқичи 5 апрель куни шифохонада ўтказилган.
Изоҳ (0)